Kompozıtor murasy – IýNESKO tórinde

Halyq qaharmany, dırıjer, asa kórnekti óner ıesiniń ǵasyrlyq mereıtoıy – tek qazaq halqy úshin ǵana emes, barsha órkenıetti álem úshin eleýli oqıǵa. Bul mańyzdy data IýNESKO tarapynan halyqaralyq deńgeıde atalyp ótetin mereıtoılar qataryna engizildi.

Atalǵan kórmede Almaty qala­syn­daǵy Mýzeıler birlestiginiń qo­rynan alynǵan 70-ke jýyq qundy já­diger qoıylǵan. Olardyń qatarynda kompozıtordyń óz qolymen jazǵan partıtýralary, sırek fotosýretteri, jeke zattary, sondaı-aq Ahmet Jubanov syıǵa tartqan «Darıǵa dombyra» da bar. Aıta keteıik, kezinde bala Nurǵısanyń mýzykalyq bilim alýyna Ahmet Ju­banov sebepker bolǵan edi. Alty ta­qyryptyq bólimnen turatyn kórme kompozıtor shyǵarmashylyǵynyń san qyryn asha túsip, qazaq mýzykasynyń tereń tamyry men órisi keń bolmysyn beıneleıdi.

Kórmeniń ashylý saltanatyna IýNESKO-ǵa múshe elderdiń elshileri, dıplomattar, halyqaralyq uıym ókil­deri, Fransııa jurtshylyǵy men sonda turatyn qazaq dıasporasy qatysty. Qazaqstannyń IýNESKO ja­nyndaǵy Turaqty ókili Asqar Abdrahmanov bul kórme qazaq mýzy­kasynyń altyn arqaýy bolǵan tulǵanyń murasyna kór­setilgen zor qurmet, túrki dúnıesiniń ortaq rýhanı keńistigin jahandyq deń­geıde tanytýdyń jar­qyn kórinisi ekenin atap ótti.

Aıta keteıik, is-sharany Almaty qalasy ákimdiginiń qoldaýymen Mýzeı­ler birlestigi uıymdastyrdy. Jo­ba­nyń júzege asýyna Qazaqstan Respýb­lıkasynyń IýNESKO janyndaǵy Turaqty ókildigi, Túrki mádenıeti jáne murasy qory atsalysty. Joba «Otyrar sazy» orkestriniń negizin qalaǵan kórnekti tulǵanyń shyǵarmashylyǵyn nasıhattaýǵa, qazaqtyń baı mýzykalyq murasyn shetel jurtshylyǵyna keńinen tanytýǵa baǵyttalǵan.

Nurǵısa Tilendıevtiń eńbekteri birtutas ulttyń mádenı murasyna aı­­nal­dy. Taý tulǵa 500-den asa mý­zykalyq týyndyny dúnıege ákelgen, 50-den asa dramalyq qoıylym men 20-ǵa jýyq kınofılmge mýzyka jazǵan. Abaı atyndaǵy Qazaq memlekettik akade­mııalyq opera jáne balet teatry­nyń, Qurmanǵazy atyndaǵy halyq aspaptar akademııalyq orkestriniń bas dırıjeri qyzmetin atqarǵan, keıin ózi negizin qalaǵan «Otyrar sazy» folklorlyq-etnografııalyq orkes­triniń kórkemdik jetekshisi boldy.

Kórme IýNESKO-nyń shtab-páte­rinde osy jyldyń 19 maýsymyna deıin jalǵasady.