Aıta keteıik, fılm Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen. Kınotýyndy ájesiniń tárbıesinde ósken balanyń taǵdyryn baıandaıdy. Fılmde kóne qazaq dástúri – balany baýyryna salý aıqyn kórinis tabady. Ájesi qaıtys bolǵan soń bala ata-anasyna oralyp, olarmen qaıta baılanys ornatýǵa tyrysady. Bul – rejısserdiń óz basynan ótken oqıǵalarǵa negizdelgen týyndy.
«Baýyryna salý» fılmi buǵan deıin de halyqaralyq deńgeıde joǵary baǵalanǵan. Ol «Asia Pacific Screen Awards» baıqaýynda úzdik jasóspirimder fılmi atandy, Ázerbaıjanda ótken «Baku International Film Festival»-diń bas júldesin ıelendi, Fransııadaǵy «Cinema Heritage Festival»-de arnaıy marapatqa ıe boldy. Sondaı-aq fılmniń operatory Janarbek Eleýbek «Asia World Film Festival»-de «Úzdik operator» atalymy boıynsha marapattaldy. Sondaı-aq Qazaqstan atynan 2025 jylǵy «Oskar» syılyǵyna «Shetel tilindegi úzdik fılm» sanatynda resmı túrde usynylǵan bolatyn.
