Áıelder arasynda buǵan deıin eshbir balýanymyz álem chempıonatynyń fınalyna jetken emes. Ábıba Ábýjaqynova (48 kg) buǵan deıin eki ret jahandyq dodanyń qola medalin oljalady. Majarstan tórinde qazaq sportynyń tarıhyna esimin altyn árippen ádipteıtin múmkindik týdy. Biraq fınaldyq saıysta tájirıbeli ıtalııalyq balýan Asýnta Skýttoǵa ese jiberdi.
Kúmis medal de az tabys emes. Aldymen reseılik Marına Vorobevamen beldesti. Negizgi ýaqytta yrǵasyp júrip, qosymsha ýaqytta qarsylasynyń ádisine qarsy tásil qoldanyp jeńiske jetti. Shırek fınalǵa shyǵar jolda belgııalyq Lýı Petıdi aıqyn utty. Shırek fınalda álem chempıonatyndaǵy úzdikterdiń biri, japon qysy Vakana Kogany sheńgeldep, ádis jasatpady. Úsh eskertý alǵan qarsylasy Ábıbanyń myqtylyǵyn moıyndady. Jartylaı fınalda ıspan qyzy Laýra Martınesti súrindirdi.
– Álem chempıonatyna ázirlik oıdaǵydaı ótti. Ispanııada oqý-jattyǵý jıynyna qatysyp, tehnıkalyq, fızıkalyq áleýetimizdi kúsheıttik. Elge kelgen soń da kem tusymyzdy bútindeýge kúsh saldyq. Ulttyq qurama bapkerleri men sheteldik mamandardyń tize qosyp baptaýy nátıjesin berdi. Buǵan deıin álem chempıonatynda eki márte qola medal buıyrdy. Ánuranymyzdy shyrqatyp, Kók týymyzdy jelbiretsem degen maqsatpen kelip edim. Buıyrǵany kúmis eken, altyn jolda degim keledi. 2027 jyly Astanada álem chempıonaty ótedi, osy dodada jankúıerlerdi qýantýǵa barymdy salamyn, – dedi daryndy sportshy.
Býdapeshttegi álem chempıonatynda synǵa túsken balýandarymyz ázirge júldeniń jalynan ustaı almaı keledi. Erler arasynda úmit artqan Maǵjan Shamshadın (60 kg) men Parıj Olımpıadasynyń qola júldegeri Ǵusman Qyrǵyzbaev (66 kg) 7-oryndy mise tutty.
