Foto: Energetıka mınıstrligi
QR Energetıka mınıstrliginiń Munaı-gaz hımııasy departamentiniń dırektory Temirlan Ýrkýmbaevtyń aıtýynsha, 2030 jylǵa deıingi salany damytý jónindegi jańa Jol kartasy eldiń dekarbonızasııa jáne ındýstrııalyq ósý strategııasynyń negizgi elementine aınalady.
«Qazaqstan tek shıkizat jetkizýshisi retinde tanylǵan kezeń aıaqtalyp keledi. Biz jańa, joǵary tehnologııaly ári turaqty ekonomıka qurýdamyz. Munaı-gaz hımııasy – bul óz resýrstarymyzdy tereń óńdeýge aparar jol. Bul jaı ǵana zaýyttar emes, bul – myńdaǵan sapaly jumys oryndary, ǵylym men tehnologııalardyń damýy, sonymen qatar Qazaqstannyń álemdik naryqtaǵy pozısııasyn kúsheıtý», dep atap ótti T.Ýrkýmbaev.
Baǵdarlamanyń negizi alty iri ınvestısııalyq joba bolady. Olardyń keıbiri qazirdiń ózinde belsendi iske asyrylyp jatyr:
Polıpropılen óndirý zaýyty (KPI): iske qosylyp, jylyna 500 myń tonna ónim óndirip otyr.
Polıetılen óndirý zaýyty: qýattylyǵy jylyna 1,25 mln tonna bolatyn zaýyt belsendi túrde salynýda (daıyndyq jumystarynyń 49%-y aıaqtaldy), iske qosylýy 2029 jylǵa josparlanǵan.
Sonymen qatar, aýyl sharýashylyǵynda, avtokólik jáne jeńil ónerkásipte suranysqa ıe bolatyn býtadıen, karbamıd jáne basqa da ónimderdi óndirý boıynsha jobalar qarastyrylyp jatyr.
Jańa klasterdiń ózegi – 3600 gektardan astam aýmaqty alyp jatqan «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵy (AEA) bolady. AEA ınvestorlarǵa daıyn ınfraqurylym men salyqtyq jeńildikter usyna otyryp, búginde 18 qatysýshy kompanııany biriktirip otyr.
Munaı-gaz hımııasyn damytý strategııasy – ekonomıkany ártaraptandyrýǵa jáne turaqty ındýstrııalyq bolashaqty qalyptastyrýǵa baǵyttalǵan Qazaqstan Úkimetiniń basym baǵyttarynyń biri.
