Anyqtalǵan qujattar qatarynda 1975 jyly Vılnıýs qalasynda ótken Qazaq kınosynyń kúnderi aıasynda Sh.Aımanov atyndaǵy «Qazaqfılm» kınostýdııasy delegasııasynyń Lıtvaǵa sapary, Qazaq KSR-niń halyq ártisi Nurmuhan Jantórın men Qazaq KSR-niń Abaı atyndaǵy Memlekettik syılyǵynyń laýreaty, rejısser Sultan Qojyqovtyń lıtvalyqtarmen kezdesýleri týraly derekti materıaldar bar.
Sondaı-aq burynǵy Kókshetaý oblysyndaǵy tyń ıgerý jumystaryna lıtvalyq mamandardyń qatysqany týraly da qundy málimetter tabyldy. Atap aıtqanda, olardyń mektep janyndaǵy lagerlerde, medısına pýnktterinde, qurylys salasynda eńbek etkeni jáne qazaq halqynyń salt-dástúrimen tanysqany jónindegi qundy derekter kezdesedi.
Zertteý jumystaryn Ortalyq memlekettik kıno-fotoqujattar men dybys jazbalary arhıvi dırektorynyń orynbasary, tarıh ǵylymdarynyń kandıdaty Sáýle Sataeva júrgizip, Vılnıýs, Kaýnas, Klaıpeda qalalaryndaǵy Ortalyq memlekettik arhıvterinde boldy.
Sapar barysynda aımaqtyq arhıv basshylarymen kezdesýler ótip, ekijaqty yntymaqtastyq máseleleri talqylandy. Nátıjesinde, XIX ǵasyrdyń sońy men XX ǵasyrdyń basyndaǵy qazaq jáne lıtvalyq áıelder beınesine arnalǵan fotokórme uıymdastyrý jóninde kelisim jasaldy.
