«Temir Taıson» endi óziniń kelesi jekpe-jegin elimizde ótkizýi múmkin. Bul aqparatty «Alash praıd» promoýsheniniń prezıdenti Álimjan Bektaev taratyp otyr. «Bıylǵy jeltoqsanda asa aýyr salmaqtaǵy álemniń absolıýtti eks-chempıony, ataǵynan at úrketin Maık Taısondy elimizge shaqyrtyp, keremet bir boks keshin uıymdastyrýdy kózdep otyrmyz. Qazir osy baǵytta jumys júrgizilip jatyr. Buıyrtsa, ol Reseıdiń maqtanyshy, aralas jekpe-jektiń has sheberi Fedor Emelıanenkomen aıqasady» deıdi Á.Bektaev.
Eger osy jospar júzege assa, elimizdiń jankúıerleri aty ańyzǵa aınalǵan qos dúldúldiń aıqasyn tamashalap, osy jekpe-jekten jaqsy bir áser alatyny sózsiz. Sebebi ekeýi de óz dáýiriniń teńdessiz tulǵasy. Maık Taıson 1986 jylǵy 22 qarashada Trevor Berbıkti ekinshi raýndta uryp jyǵyp, álem chempıony atandy. Ol kezde Maık 20 jasta edi. Sóıtip, onyń esimi osyndaı dárejege jetken eń jas kásipqoı boksshy retinde tarıhta qaldy. 1985–1989 jyldar aralyǵynda 37 ret rıngke shyqqan AQSh-tyń arlany barlyq básekede basymdyq tanytty. Taıson jalpy 59 kezdesýdiń 50-inde jeńiske jetti. 44 qarsylasyn nokaýtqa jiberdi. 7 márte utylyp, taǵy eki básekeniń nátıjesi esepke alynǵan joq.
Fedor Emelıankonyń da ataǵy alysqa jaıylǵan. Ol jaýyngerlik sambodan álemniń birneshe dúrkin chempıony, aralas jekpe-jekten «Praıdtyń» chempıondyq belbeýiniń ıegeri. 2001–2009 jyl aralyǵynda «Sońǵy ımperator» birde-bir aıqasta jeńilgen joq. Sol segiz jyl aralyǵynda 27 qarsylasyn sulatyp saldy. Barlyǵy 47 kezdesý ótkizgen Emelıanenko sonyń 40-yn óz paıdasyna sheshti. 31 básekede aıqyn basymdyq tanytty. Bul – óte keremet kórsetkish.
