Taıaýda iske qosylatyn jańa óndiris qaptama ónimderiniń ózindik qunyn tómendetýge, júzdegen jańa jumys ornyn ashýǵa jáne otandyq shıkizat bazasyn damytýǵa múmkindik beredi.
«Gofrotara» JShS dırektory Gúlnar Qaıdarovanyń aıtýynsha, kompanııa óndiristik qýatyn turaqtandyrý maqsatynda makýlatýrany ózi óńdeýge bel býǵan.
– Importtyq shıkizat baǵasy qubylǵan saıyn ónimniń ózindik quny da ósedi. Al jańa zaýyt shıkizatty ózimiz óndirýge jol ashady. Bul – strategııalyq sheshim. Ony jergilikti bılik te qoldap otyr, – dedi ol.
Joba arnaıy ekonomıkalyq aımaqta júzege asyrylyp jatyr. Ol «Damý-О́ndiris» óńdeýshi ónerkásipti qoldaý baǵdarlamasy jáne «Bıznestiń jol kartasy – 2025» memlekettik baǵdarlamasy aıasynda qarjylandyrylýda.
Kompanııa ókilderi jobany daıyndaý kezinde Qytaı men Túrkııadaǵy ozyq tájirıbeni zerttegen. Bul elderde sapany baqylaý tolyq avtomattandyrylǵan.
– Avtomattandyrylǵan júıe qaǵaz polotnosynyń qalyńdyǵy men tyǵyzdyǵyn myńdaǵan núktede tekseredi. Mundaı jabdyq bolashaqta óndiriletin kartonnyń joǵary sapasyn qamtamasyz etedi, – dep tolyqtyrdy kásiporyn basshysy.
Qazirgi tańda jumys istep turǵan zaýyt aı saıyn 1,2 mln sharshy metr gofrokarton shyǵarady. Onyń qýaty – 2 mln sharshy metr. Al jańa zaýyt iske qosylǵan soń jylyna 60 myń tonna makýlatýra óńdelmek.
Pavlodar kartondary tamaq ónerkásibinen bastap medısınaǵa deıin túrli salada keńinen qoldanylady. О́ndiris tolyǵymen avtomattandyrylǵan: kóp tústi baspa (CMYK standarty), kesý, qalyppen shabý jáne jelimdeý prosesi sıfrly júıemen basqarylady. О́nimder elimizdiń túkpir-túkpirine jetkiziledi.
О́ndiristik seh basshysy Evgenıı Sınınniń aıtýynsha, otandyq shıkizatty qoldaný kompanııanyń ishki jáne syrtqy naryqtaǵy ornyn kúsheıtedi.
– Qazir elimizdegi makýlatýranyń basym bóligi shetelge jóneltiledi. Al jańa zaýyt ony elimizdiń ishinde qaıta óńdeýge múmkindik beredi. Bul – joǵary qosylǵan quny bar ónim shyǵarý degen sóz, – dedi ol.
Kásiporynnyń 2026 jyldyń sońynda nemese 2027 jyldyń basynda iske qosylýy josparlanyp otyr. Jańa óndiris shamamen 200 adamdy jumyspen qamtamasyz etpek.
Makýlatýrany qaıta óńdeý zaýyty – bul tek ónerkásipke salynǵan ınvestısııa ǵana emes, sonymen qatar óńirdiń ekologııalyq turaqtylyǵyna qosylǵan úles. Ekinshi shıkizatty paıdalaný qorshaǵan ortaǵa túsetin salmaqty azaıtady, tuıyq sıkldi ekonomıkany qoldaıdy jáne kómirqyshqyl gazynyń izin tómendetýge yqpal etedi.
