«Egemendikter» – úzdikter qatarynda

Astana qalasy dene shy­nyqtyrý jáne sport bas­qarmasynyń uıym­das­ty­rýymen alǵash ret túńligi túrilgen saıysqa 100-den asa áýesqoı sportshy-jýrnalıster qatysty. «Alpha Gym» sport keshenindegi básekede qalamgerler láńgi tebý, bes asyq, asyq atý, voleıbol boıynsha saıysty.

Láńgi tebýde «Habar» agenttiginiń ókili Maqsat Serikjanov 83 upaımen jeńiske jetti. Kúmis júlde 79 upaı jınaǵan «Qazaq radiosy» jýrnalısi Muqtar Turtaıulyna buıyrsa, «Habar» agenttigininiń taǵy bir qyzmetkeri Muhammedjan Temirov (69 upaı) qola júldeger atandy.

Bes asyqta «RTRK Qazaqstan» redaktory Nurǵaısha Ábdýahıt top jarsa, kúmis júlde Tańsholpan Ryskeldınaǵa (Sporttyq medısınalyq ortalyǵy), qola medal Aınur Ýmra­lınovaǵa (№10 shaıbaly hokkeı sport mektebi) buıyrdy.

Asyq atý komandalyq saıys ereje­simen ótip, «RTRK Qazaqstan» AQ birinshi oryndy qanjyǵalaryna baılady. «Qazaq radiosy» men «Habar» agenttigi úzdikter qatarynan kórindi.

Jyl saıyn «BAQ Liga» dodasynda júldeger qatarynan tabylatyn habar­l­yq voleıbolshylar fınalda «Qazaq radiosy» ujymyn 2:0 esebimen aıqyn jeńip, altyn medal ıelendi. Qola júlde úshin ótken kezdesýde «Egemen Qazaqstan» gazetiniń komandasy Astana qalalyq sport basqarmasynan jasaqtalǵan «Tarlan» komandasynan basym tústi. «Úzdik shabýylshy» ata­lymy boıynsha arnaıy syılyq Jambyl Janbolatqa («Qazaq radiosy») berildi. Baıan Súleımenqyzy («Egemen Qazaqstan») «Úzdik úılestirýshi», Esenǵazy Imanǵazy («Habar») «Úzdik oıynshy», Daıana Toqtaǵulova «Úzdik qorǵaýshy» (RSK) atandy. Jeńimpazdar men júldegerler kýbok, medal, dıp­lom, baǵaly syılyqtarmen marapattaldy.

Spartakıada sońynda sóz alǵan As­tana qala­sy dene shynyqtyrý jáne sport basqarmasy bas­shysynyń orynba­sary Azamat Aǵzamov, elorda kommýnıkasııalar qyzmetiniń basshysy Abzal Dosyman, qalalyq sporttyq-buqaralyq is-shara­lardy ótkizý dıreksııasynyń bas­­shysy Azamat Belgibaev ıgi is-shara jyl saıyn jalǵasyn tabatynyn aıtyp, sa­la­­matty ómir saltyn ustanýǵa mundaı sa­ıys­tardyń tıgizer septigi mol ekenin jetkizdi.