Kollajdy jasaǵan – Záýresh Smaǵul, «EQ»
Qaıtarylatyn qarajat Qarjy mınıstrliginiń janynan qurylǵan Arnaýly memlekettik qorǵa túsedi. Búginde qarjynyń basym bóligi áleýmettik mańyzy joǵary ınfraqurylymdy jandandyrýǵa bólindi. Qazirde jalpy quny 318 mlrd teńge mólsherinde 406 jobany qarjylandyrý maquldandy. Onyń ishinde 9 bilim berý nysany, sport salasyndaǵy 3 nysan, densaýlyq saqtaý salasyndaǵy 162 joba, sýmen jabdyqtaý salasyndaǵy 159 jobany qosqanda 333 joba iske asyrylyp jatyr.
Barlyq joba Memleket basshysynyń áleýmettik mańyzy bar ınfraqurylymdy damytý jónindegi tapsyrmasy aıasynda júzege asyrylady. Bilim berý nysandary sapaly bilimniń qoljetimdiligin arttyrýǵa yqpal etedi. Sport nysandary buqaralyq sportty damytýǵa, salamatty ómir saltyn qalyptastyrýǵa serpin beredi.
Senat depýtaty Janbolat Jórgenbaev shalǵaıdaǵy eldi mekenderde áleýmettik nysandardyń salynýy turǵyndardyń aýyldan kóshpeýine sebep bolatynyn aıtady.
«Elimiz – áleýmettik memleket. Prezıdent áleýmettik máselelerge únemi erekshe mán berip, jaýapkershilik júktep keledi. Qaıtarylǵan aktıvterdiń qarajaty esebinen 400-den asa áleýmettik nysan salynýy kóptegen túıtkildiń túıinin tarqatýǵa septigin tıgizedi. Jyldan-jylǵa qaıtarylǵan qarjyǵa salynatyn nysandar sany da arta túspek. Aýyl – ultymyzdyń altyn qaınary. Sol aýyldyq jerdegi aǵaıynnyń áleýetin kóterýde eń áýeli áleýmettik másele týyndamaýǵa tıis. Aýyzsýdan taryqpaýy qajet, ınfraqurylymnyń da ıgiligin kórýi kerek. Basy aýyryp, baltyry syzdaǵan adam shalǵaıdaǵy aýdan ortalyǵyna sabylmaı-aq, aýyldyq okrýgtegi emhanadan tıisti em-domyn alatyndaı jaǵdaı jasalýy qajet. Mektep oqýshylary da zamanaýı tehnologııamen jabdyqtalǵan kabınetterde bilim alýǵa tıis. Sondyqtan da qaıtarylǵan aktıvterdiń áleýmettik salany kúsheıtýge jumsalýy quptarlyq is», deıdi depýtat.
Infografıkany jasaǵan – Amangeldi Qııas, «EQ»
Shalǵaıdaǵy eldi mekenderde «Aýylda densaýlyq saqtaýdy jańǵyrtý» baǵdarlamasy aıasynda medısınalyq mekemeler salynady.
Sý qubyry jelileriniń qurylysy 2025 jylǵa deıin elimizdiń barlyq qalasy men aýylyn tolyqtaı taza aýyzsýmen qamtamasyz etýdiń strategııalyq maqsatyna sáıkes júrgizilip keledi. Bul – halyqtyń turmys sapasyn jaqsartý jolyndaǵy mańyzdy qadam.
О́ńirlerde qaıtarylǵan aktıvter qarajaty esebinen bilim berý mekemeleri, sport keshenderi, densaýlyq saqtaý, sýmen jabdyqtaý nysandarynyń qurylysy qarqyn aldy. Máselen, Astanada eski stadıonnyń ornyna Q.Muńaıtpasov atyndaǵy jańa stadıon salynyp jatyr. Jabyq sport ǵımaraty múgedektigi bar azamattarǵa arnalǵan oryndardy qosqanda, 3 598 orynǵa eseptelgen. Qurylys UEFA-nyń halyqaralyq standarttaryna sáıkes júrgiziledi.
Almatyda qaıtarylǵan aktıvter qarajaty esebinen sýmen jabdyqtaý júıesin salý jónindegi 9 joba qurylysy júrip jatyr. Shymkent qalasyndaǵy «Saıram kómekshi mektep-ınternat-kolledji» kesheniniń tárbıelenýshilerine arnalǵan 300 oryndyq jataqhana salynady. Shyǵys Qazaqstan oblysynda da qaıtarylǵan aktıvterge aýqymdy joba júzege asyrylady. Arnaýly memlekettik qordan Gematologııa ortalyǵynyń qurylysyn tolyq aıaqtaýǵa qomaqty qarjy bólindi. Bas ǵımaratta zamanaýı medısınalyq jabdyqtarmen zerthanalar, radıasııalyq dıagnostıka, kardıologııa, kardıohırýrgııa, gematologııa, súıek kemigin transplantasııalaý, kúrdeli somatıka bólimsheleri jabdyqtalady. Jańa ortalyq naýqastarǵa emdeýdiń, ońaltýdyń ozyq ádisterine qol jetkizýge múmkindik beredi. Sonymen qatar óńirde qaıtarylǵan aktıvter esebinen taǵy 8 joba: densaýlyq saqtaý salasynda – 2, sýmen jabdyqtaý baǵytynda 6 joba iske asyrylyp jatyr.
Soltústik Qazaqstan oblysynda da óńirdi sýmen jabdyqtaýdy jaqsartýǵa baǵyttalǵan jobalar atqarylady. Qor qarajaty esebinen Sokolov, Býlaev, Presnovskıı toptyq sý qubyrlaryn qaıta jańartý, sondaı-aq Kókshetaý toptyq sý qubyryna qosylǵan Aıyrtaý aýdany men Shal aqyn aýyldyq eldi mekenderinde jańa sý qubyrlary men burmalar salynyp jatyr.
Qaraǵandy oblysyndaǵy 7 aýdanda 51 densaýlyq saqtaý nysanyn, onyń ishinde dárigerlik ambýlatorııalardy, sondaı-aq feldsherlik-akýsherlik, medısınalyq pýnktterdi salý josparlanyp otyr.
Aqmola oblysynda densaýlyq saqtaý, sýmen jabdyqtaý, sport salasynda 38 joba júzege asyrylyp jatyr. Qaıtarylǵan aktıvter esebinen eki medısınalyq nysan salyndy. Arshaly aýdanynyń Arnasaı aýylynda 2 myńnan astam adamǵa qyzmet kórsetetin dárigerlik ambýlatorııa paıdalanýǵa berildi, Bulandy aýdanynyń Altyndy aýylynda feldsherlik-akýsherlik pýnkt ashyldy. Endi úsh eldi mekenniń bir myńnan astam turǵyny ýaqtyly medısınalyq kómek alýǵa aýdan ortalyǵyna sabylmaıdy.
Aqtóbe oblysynda da qaıtarylǵan aktıvter esebinen jańa bilim berý men densaýlyq saqtaý nysandary salynady. О́ńirde áleýmettik mańyzy joǵary 12 joba qolǵa alyndy. Solardyń biri – Aqtóbe qalasyndaǵy erekshe balalarǵa arnalǵan arnaıy balabaqsha.
Qordan Abaı oblysynda áleýmettik mańyzy bar 24 nysandy júzege asyrýǵa qarjy bólindi. О́ńirde jańadan sýmen jabdyqtaý jelileri, sondaı-aq medısınalyq mekemeler salynady.
Atyraý oblysynda densaýlyq saqtaý, bilim berý, sýmen jabdyqtaý salalarynda bir nysannan salynady.
Jetisý oblysynda bilim berý, densaýlyq saqtaý, sýmen jabdyqtaý salalarynda 22 jobany júzege asyrý josparlanǵan.
Almaty oblysynda jańa sport nysandary, sýmen jabdyqtaý jelileri men medısınalyq mekemeler salynady. Úkimettiń sheshimimen bólingen qarajat Kegen aýdany Jalaǵash aýylynda sport keshenin salýǵa paıdalanylady.
Jambyl oblysynda 19 joba salynady. 4 joba densaýlyq saqtaý salasynda, taǵy 15 joba sýmen jabdyqtaý jelilerin salýǵa baǵyttalyp otyr.
Batys Qazaqstan oblysynda jyl sońyna deıin feldsherlik-akýsherlik pýnktter, dárigerlik ambýlatorııalar, sondaı-aq sý qubyrlaryn salý jónindegi 25 jobany tapsyrý josparlanǵan.
Mańǵystaý oblysynda qaıtarylǵan aktıvterge bir densaýlyq saqtaý nysany salynady. Qostanaı oblysynda sýmen jabdyqtaý jelileri túbegeıli jańartylady. Sondaı-aq óńirde densaýlyq saqtaý, bilim berý nysandaryn salý josparlanyp otyr. Túrkistan oblysynda bir bilim berý obektisin salý, sondaı-aq óńir turǵyndaryn sýmen qamtamasyz etýge qatysty 35 joba iske aspaq.
Pavlodar men Qyzylorda oblystarynda sýmen jabdyqtaý jelileri men medısınalyq mekemelerdiń qurylysyna arnalǵan birneshe jobany iske asyrý josparlanǵan. Ulytaý oblysynda jańa bilim berý, densaýlyq saqtaý, sýmen jabdyqtaý nysandary salynady. Osylaısha, qaıtarylǵan qarajat negizinen áleýmettik nysandar salýǵa baǵyttalyp otyr.
