Atalmysh keńestiń mindeti – elimizdegi medısınalyq qaýymdastyqtyń múddesin qorǵap qana qoımaı, densaýlyq saqtaý júıesindegi ózekti máselelerdi ashyq kóterip, mindetti áleýmettik medısınalyq saqtandyrý júıesin jetildirýge baǵyttalǵan.
Keńestiń qalǵan músheleri – densaýlyq saqtaý salasynyń barlyq máselelerimen etene tanys ári medısına júıesin tereń meńgergen sarapshylardan quralǵandyqtan (medısınalyq uıymdardyń basshylary, respýblıkalyq ǵylymı ortalyqtardyń ókilderi, birlestikter men qaýymdastyqtar, depýtattar), olardyń tarapynan ásirese medısınalyq kómekti qarjylandyrýǵa qatysty mańyzdy máselelerdi egjeı-tegjeıli qarastyrý usynyldy.
Atap aıtqanda, Keńes músheleri medısınalyq uıymdarǵa qarajatty bólý tártibin, monıtorıng júıesindegi ózgeristerdi, sondaı-aq kórsetilgen medısınalyq qyzmetter úshin uıymdarǵa ýaqytyly aqy tóleýdi qamtamasyz etýge baǵyttalǵan sharalardy saraptaýǵa basa nazar aýdarmaq.
