Osydan biraz ýaqyt buryn Qatardyń bas shahary Dohada álem chempıonatynyń jalaýy jelbiredi. Sol jarysta sarapqa salynǵan bes bas júldeniń tórteýin Qytaı quramasy oljalady. Bireýin Japonııa jampozdary jeńip aldy. Kúmis pen qola medal alǵandar qatarynda Brazılııa, Taıpeı, Aýstrııa, Rýmynııa, Ońtústik Koreıa, Fransııa, Gonkong, Shvesııa órenderi bar. Tórtkúl dúnıeniń teńdessizderi bas qosqan básekede elimizdiń de ústel tennısshileri óner kórsetti. Otandastarymyzdyń arasynan eń úzdik kórsetkishke Kırıll Gerasımenko qol jetkizdi. Ol 1/16 fınalǵa deıin jetip, osy mejede Álem kýboginiń ıegeri, Panamerıka oıyndarynyń 6 dúrkin jeńimpazy, brazılııalyq Ýgo Kalderanoǵa jol berdi. Negizi, bul oıynnyń alǵashqy eki partııasy Gerasımenkonyń paıdasyna sheshilgen edi. Biraq odan keıin qaharyna mingen Kalderano qatarynan tórt partııany óz paıdasyna sheshti.
Atalǵan jarystan keıin de dúbirli dodalarda daralanyp júrgen sańlaqtar birqatar týrnırde baq synady. Sonyń nátıjesinde apta saıyn álemdik reıtıngke ózgeris engizilip otyrady. Búginde Lın Shıdýn (8675 upaı) shashasyna shań juqtyrar emes. Bıyl aqpan aıynda birinshi orynǵa kóterilgen 20 jastaǵy Qytaıdyń asa daryndy oıynshysy áli de sol tuǵyrdan túsken joq. Shıdýn Býdapesht, Amman, Almaty, Makao, Maskat, Frankfýrt, Sıngapýr, taǵy basqa qalalarda uıymdastyrylǵan týrnırlerde top jardy.
Ekinshi orynda Qytaıdyń taǵy bir dúldúli – Van Sısýn (5275). Onyń jasy 25-te. Alǵash ret 2018 jyly jasóspirimderdiń Dúnıejúzilik olımpıadasynda altyn tuǵyrǵa kóterilgen Sısýn sol kezden beri babyn joǵaltqan joq. Sheberligin shyńdaı júrip, talaı bıikti baǵyndyrdy. Olardyń arasynan Azııa oıyndary, Azııa kýbogi, WTT sanatyndaǵy týrnırler serııasy, Parıj olımpıadasynyń komandalyq saıysyndaǵy jarqyn jeńisterin atap ótýge bolady. Bıyl Dohadaǵy álem chempıonatynda da dál osy sportshy qarsylas shaq keltirgen joq.
Parsy shyǵanaǵynda K.Gerasımenkony jolynan yǵystyrǵan Ýgo Kalderano (4575) úzdikter tiziminde úshinshi orynda. 28 jastaǵy marqasqa sol jarysty kúmis medalmen qorytyndylady. Byltyr Olımpııa oıyndarynda tórtinshi orynǵa turaqtady. Japonııa juldyzy Tomakadzý Harımoto (4550) ozyq tórttikti túıindep tur. Sondaı-aq TOP-10 tennısshiniń qatarynda qytaılyq Lıan Szınkýn (3900) men Sııan Pen (2270), fransııalyq Felıks Lebrýn (3220) men Aleks Lebrýn (2420), shvesııalyq Trýls Moregard (3155), slovenııalyq Darko Iorgıch (2070) syndy saıypqyrandar bar.
Elimizdiń eń myqty ústel tennısshisi K.Gerasımenko 60-orynda. 28 jastaǵy Astananyń týmasy Rıo-de-Janeıro, Tokıo, Parıj olımpıadalaryna qatysty. Álem chempıonattarynda da jıi boı kórsetip júr. Birqatar asa iri halyqaralyq jarysta tabysty óner kórsetti. Máselen, bıyl elimizdiń erler men áıelder quramasy óz tarıhynda tuńǵysh ret Azııa chempıonatynda úzdik segiz komandanyń qataryna qosyldy. Jerlesterimizdiń osyndaı tabysqa jetýine Kırıldiń qosqan úlesi orasan zor. Ol óz básekesiniń barlyǵynda jeńiske jetti.
Keıbireýlerge K.Gerasımenkonyń ITTF reıtınginde 60-orynda turýy qarapaıym ǵana kórsetkish bolyp kórinýi múmkin. Áste olaı emes. Búginde tańda TOP-60-tyqtyń qataryna sanaýly ǵana memlekettiń órenderi enip otyr. Atap aısaq, bul tizimde Qytaıdyń – 11, Japonııa men Ońtústik Koreıanyń – 6, Fransııa men Germanııanyń – 5, Aýstralııanyń – 4, Taıpeı men Mysyrdyń – 3, Brazılııa, Shvesııa, Danııanyń – 2-den, Slovenııa, Nıgerııa, Horvatııa, AQSh, Gonkong, Ispanııa, Polsha, Úndistan, Ulybrıtanııa, Kanadanyń 1 ókili bar. Bar-joǵy 22 eldiń ǵana órenderi myqtylardyń sanatyna qosylyp otyr. Kórip otyrǵanymyzdaı, bul tizimde KSRO quramynda bolǵan bir ǵana memlekettiń oıynshysy bar. Ol – elimizdiń birinshi raketkasy Kırıll Gerasımenko.
Elimizdiń ekinshi raketkasy Alan Qurmanǵalıevtiń de qarqyny jaqsy. Jasóspirimder men jastar býyny arasyndaǵy jarystarda ózin túbegeli moıyndatqan qandasymyz 2019 jyly álemniń eń úzdik jas oıynshysy atandy. О́z qatarlastary arasynda álemdik reıtıngte kósh bastady. Eresekter dýyna da erkin qosyldy. Keıinnen talaı dúbirli dodada daralandy. Qazirgi kezde A.Qurmanǵalıev ITTF reıtınginde 155-orynda tur. Alannyń jasy 18-de ekenin eskersek, sheberligi shyńdala kele onyń baǵyndaratyn belesteri búgingiden áldeqaıda zor bolatynyna senim mol.
Ústel tennısin serik etken ózge jerlesterimiz mynadaı oryndarǵa jaıǵasqan: Aıdos Kenjeǵulov – 296, Sanjar Jubanov – 349, Eskendir Harkı – 356, Vladıslav Zaharov – 433, Dastan Kenjeǵulov – 469, Saǵadat Qurmambaev – 479.
