Foto: Túrkistan oblysynyń Tótenshe jaǵdaılar departamenti
Oqıǵa Beıbitshilik kóshesinde ornalasqan avtokólikterge janarmaı quıý beketinde bolǵan. Jarylys tógilgen janarmaıdyń gaz-aýa qospasynan tutanýy saldarynan bolǵan.
Jalyn birden kórshiles jeke turǵyn úıge, kommersııalyq ǵımaratqa jáne dárihana men dúkenge taraǵan. О́rttiń jalpy aýdany 855 sharshy metrdi quraǵan.
Jarylys saldarynan 1996 jyly týǵan júrgizýshi aýyr dárejedegi kúıik alyp, shuǵyl túrde aýrýhanaǵa jetkizilgen. Aldyn ala málimet boıynsha, onyń denesiniń 85–90% kúıip qalǵan.
«Oqıǵanyń saldaryn joıý úshin TJD (jeke quramnyń 31 adamy men 9 birlik tehnıkasy), Shymkent qalasy Tótenshe jaǵdaılar departamentiniń (8 adam jáne 2 birlik tehnıka), ishki ister organdarynyń (4 adam jáne 1 birlik tehnıka), sondaı-aq jergilikti atqarýshy organdardyń (10 adam jáne 2 birlik tehnıka) kúshteri men quraldary jumyldyryldy. Oqıǵa ornynda tergeý bólimi men órt-synaý zerthanasynyń qyzmetkerleri jumys istep jatyr», dep habarlady Túrkistan oblysynyń Tótenshe jaǵdaılar departamenti.
Qazir gaz-aýa qospasynyń tutaný sebepteri anyqtalyp jatyr.
Aıta keteıik, sońǵy ýaqytta Qazaqstanda kópqabatty úılerde órtterdiń jıilep ketkeni baıqalady. Bıylǵy jyldyń alǵashqy bes aıynda elimizde 369 órt oqıǵasy tirkelgen.
