Baǵdarlamany «Astana Opera» balet trýppasynyń kórkemdik jetekshisi Altynaı Asylmuratova ázirledi. Eki bólimnen turǵan bul kesh kórermen qaýymǵa klassıkalyq ári zamanaýı horeografııa jaýharlaryn usyndy. Oǵan qosa qazaq avtorlarynyń shyǵarmalary sheteldik sheberlerdiń týyndylarymen úılesimdi úndestik tapty. Elorda turǵyndary otandyq sahnanyń tanymal juldyzdary – teatrdyń jetekshi solısteriniń sheberligin de, jas daryndardyń jetistikterin de joǵary baǵalady. Osy keshte óz ónerlerin teatrdyń prımasy Mádına О́nerbaeva, jetekshi solıst Arman Ýrazov, solıster Serik Naqyspekov, Aıbar Toqtar, Dıas Qurmanǵazy, Móldir Shákimova, balet ártisteri Kamıla Shahmanova, Ǵazıza Moldahmet, Kamıla Ormanova, Nazıra Zaetova, Jaqsylyq Saýqymbekov jáne trýppanyń basqa da bıshileri kórsetti.
Gala-balet baǵdarlamasy aıasynda birinshi bólimde jaqsy tanylǵan klassıkalyq nómirler – Iý.Grıgorovıchtiń horeografııasynda P.Chaıkovskııdiń «Shelkýnchık» baletinen pa-de-de, K.Goleızovskııdiń horeografııasynda V.Jelobınskııdiń mýzykasyna Syǵan bıi jáne M.Petıpanyń horeografııasynda R.Drıgonyń «Talısman» baletinen pa-de-de usynyldy. Zamanaýı horeograf, «Astana Opera» solısi Sultanbek Ǵumardyń erekshe qoıylymdary – «HasSak» etno-folklorlyq tobynyń mýzykasyna «Toı bastar» men «Kemel adam» jáne «Turan» etno-folklorlyq ansambliniń óńdeýinde Aqtoty Raıymqulovanyń mýzykasyna jazylǵan «Máńgúrt» shyǵarmasy keshtiń sánine aınaldy. Balet ártisteri dırıjer Erbolat Ahmedıarovtyń jetekshiligindegi «Astana Opera» sımfonııalyq orkestriniń súıemeldeýimen óner kórsetti. Jaqynda maestro shyǵarmashylyq ujymdy dırıjer retinde tolyqtyrǵanyn aıta keteıik.
Al ekinshi bólimde kórermen qaýymdy zamanaýı nemis horeografy Raımondo Rebektiń qazaq trýppasy úshin arnaıy qoıǵan «How Long Is Now?» («Qazirgi sát qansha ýaqytqa sozylady?») bir aktili baleti qýantty. Spektakl ýaqyt aǵymy jáne ony adamnyń aqyl-parasatpen qabyldaýy týraly fılosofııalyq tolǵamǵa qurylǵan, munda ártisterdiń úsh juby adamnyń ómir jolynyń túrli kezeńin beıneleıdi. «Astana Operadaǵy» balet keshi ádettegideı keremet ótti. Nómirler óte tamasha oryndaldy, trýppa minsiz tehnıkany, qozǵalys mánerliligin, keremet ártistikti jáne mýzykalyq sheberlikti kórsetti. Al ulttyq nómirler áser etkeni sózsiz», deıdi kórermen Jamal Nurqaıymova.
Eske sala keteıik, bul kesh «Operalııa – 2025» festıvali aıasyndaǵy sońǵy balettik is-shara jáne balet trýppasyn jazǵy demalys kútip tur. Al 12–13 shildede «Astana Opera» sahnasynda halyqaralyq festıvaldy ári XII teatrlyq maýsymyn túıindeıtin Dj.Pýchchınıdiń «Týrandot» áıgili operasynyń aýqymdy qoıylymy usynylady.
