Ǵalymdardyń aıtýynsha, oflaın is-sharalarǵa jıi qatysatyn adamdarda qýanysh, qanaǵattaný sezimi men belsendi qatysý deńgeıi edáýir joǵary bolady. Zertteýge Ońtústik Aýstralııanyń 351 turǵyny qatysqan. Nátıjesinde, oflaın formattaǵy sharalarǵa jıi qatysý adamnyń ómirge degen qyzyǵýshylyǵyn arttyryp, mentaldyq densaýlyqqa oń áser etetini naqty derektermen dáleldendi.
Zertteýshiler qatysýshylardan túrli sharalarǵa – mádenı festıvalderden bastap fermerlik jármeńkelerge deıin – qanshalyqty jıi barǵandaryn surap, olardyń psıhologııalyq hal-kúıin PERMA ádistemesi arqyly baǵalaǵan. Bul model bes baǵytty qamtıdy: pozıtıvti emosııalar, tartylý (engagement), qarym-qatynas, maǵyna jáne jetistik sezimi.
Turaqty túrde oflaın sharalarǵa qatysatyn adamdarda qýanysh, shabyt, tolqý sekildi pozıtıvti emosııalar basym bolǵan. Eń qyzyǵy – olar ýaqyttyń qalaı ótip ketkenin baıqamaı, oqıǵaǵa tolyq berilip ketetinderin aıtqan. Bul – sáttik kóńil kóterýden de mańyzdyraq áser: tereń psıhologııalyq sińisý.
Ǵalymdar oflaın is-sharalardyń ásirese psıhıkalyq turǵydan álsiz kezeńde júrgen adamdar úshin erekshe paıdaly ekenin atap ótti. Al onlaın is-sharalar mundaı áser bere almaıdy.
«Adamdar kóp jınalatyn ortada bolý – tirshilik sezimin oıatady. Bul bizge osy sátte ómir súrip jatqanymyzdy sezindiredi», – dep aıtylǵan zertteýde.
