Jańa óndiris oshaǵynyń ashylý saltanatyna qatysqan óńir basshysy Erbol Qarashókeevtiń aıtýynsha, kúıdirilgen kirpish shyǵaratyn zaýyttyń áleýeti zor. Kásiporyn basshylyǵy birinshi kezekte óńirge keletin ımport kólemin azaıtýǵa den qoıyp otyr. Investısııalyq jobanyń júzege asýyna jergilikti kásipker Berik Júsipov bastamashy bolǵan eken. Odan ózge de birneshe ınvestor kásiporyn jumysyn jetildirý úshin qarjy quıyp, zaýyt qurylysyn jedeldetýge atsalysqan.
«Zaýyt tolyqtaı avtomattandyrylǵan. Mundaǵy jańa tehnologııalar óndiris tıimdiligin arttyryp, ónim sapasyn joǵary deńgeıde saqtaýǵa múmkindik beredi. Kásiporyn jergilikti naryqta ımport kólemin aıtarlyqtaı azaıtyp, óńirdiń áleýmettik-ekonomıkalyq damýyna zor áser etpek. Jobany iske asyrǵan «Eskermes» kásipkerliginiń jetekshisi Berik Júsipovke zor alǵys aıtamyn. Munda óndirilip kúıdirilgen kirpish óńir brendine aınalady degen senim zor. Zamanaýı zaýyttyń iske qosylýy óńir úshin zor qýanysh ekeni daýsyz. Kásiporyn jumysy sátti bolsyn», dedi oblys basshysy.
Resmı derekke júginsek, jańa jobany iske asyrý úshin 2,5 mlrd teńge ınvestısııa salynypty. Jergilikti kásipker Berik Júsipov 1 mlrd teńge qarajatty ózi quısa, qalǵan 1,5 mlrd teńgeni basqa ınvestorlar salǵan. Kásiporyn elimizdegi tuńǵysh avtomattandyrylǵan kirpish zaýyty ekenin aıta ketken jón.
Kásiporyn ókilderiniń aıtýynsha, zaýytqa qajetti qurylǵylar kórshiles Qytaı Halyq Respýblıkasynan satyp alynǵan. О́ndiris oshaǵy jylyna 36 mln dana kirship óndirýge qaýqarly.
«Jańadan ashylǵan zaýyttaǵy jumys aıtarlyqtaı qıyn emes. О́ıtkeni óndiris oshaǵy ýaqyt suranysyna saı jańa tehnologııamen qamtylǵan. Bul óz kezeginde kásiporyn qyzmetkerleriniń jumysty júıeli túrde atqarýyna múmkindik beredi. Bizdiń ónim elimizdiń ár qıyryndaǵy qurylys jumystaryna paıdalanylady dep senemiz. Eń bastysy, jumysshylardyń oıdaǵydaı, alańsyz jumys isteýine barlyq jaǵdaı qarastyrylǵany kóńil qýantady. Endi zaýyt qyzmetkerleri tek sapaly ónim shyǵarýǵa den qoıatyny daýsyz», deıdi jańa kásiporynnyń kran júrgizýshisi Ramazan Alshoraz.
Mamandardyń aıtýynsha, kúıdirilgen kirpish shyǵaratyn zaýyt jumysy bir júıege negizdelgen. Aldymen topyraq, sý jáne kómir arnaıy qurylǵyda aralastyrylady. Shamaly ýaqyttan soń qospalar tyǵyzdalyp, kirpishtiń pishinine keltiriledi. Budan soń ónim arnaıy peshke salynyp, 400 gradýs ystyqta keptiriledi. Keıin 800 gradýs temperatýrada kúıdiriledi. Daıyn bolǵan kirpishterdi arnaıy robottar jınap suryptaıdy. Ázirlengen ónim elimizdiń barlyq qıyryn qamtyp qana qoımaı, kórshiles elderge eksportqa shyǵarylmaq.
О́ńir basshysy Erbol Qarashókeevtiń aıtýynsha, bıyl 115 mln dollar kóleminde tikeleı sheteldik ınvestısııa tartý josparlanǵan. Al byltyr jalpy quny 214 mlrd teńgeni quraıtyn 35 ınvestısııalyq joba iske qosylyp, 1 500-ge jýyq jańa jumys orny ashylypty. 2025–2028 jyldar aralyǵynda jalpy somasy 2,5 trln teńgeni quraıtyn 62 jobany iske qosý kózdelgen. Nátıjesinde, 6 myńǵa jýyq jańa jumys orny qurylmaq.
Jambyl oblysy,
Baızaq aýdany,
Dıqan aýyly
