Qalada otbasynyń shyrqyn buzatyndarmen 4 daǵdarys ortalyǵy jumys isteıdi. Jyl basynan beri 712 áıel ortalyqqa júgingen. Qazir 135 ana, 278 bala sol ortalyqty ýaqytsha panalap otyr. Polısııa 31 áıel men 56 balany osy ortalyqqa jetkizgen. Mekeme mamandary kúıeýlerinen, ákelerinen zábir kórgen áıelder men balalarǵa áleýmettik, psıhologııalyq, quqyqtyq kómek kórsetedi. Megapolıstegi «Baqytty januıa» ortalyǵy da eki júzden astam otbasyǵa quqyqtyq keńes bergen.
Jaýapty sala mamandary otbasylyq zorlyq-zombylyqpen kúres sharasyn kúsheıtip jatqandaryn aıtady. Osy maqsatqa oraı shaharda turmystyq zorlyq-zombylyqtyń aldyn alý jumystary jyl basynan beri jalǵasyn taýyp keledi. Máselen búginge deıin mektepterde osy taqyrypqa qatysty kóptegen semınarlar uıymdastyrylsa, Jastar resýrstyq ortalyǵynyń músheleri «dóńgelek ústel» jıyndaryn ótkizgen. Sonymen birge bıyl sáýir-maýsym aılarynda «Otbasynda zorlyq-zombylyqsyz Qazaqstan» aksııasy aıasynda júzge jýyq is-shara qolǵa alyndy. Onyń ishinde túrli dárister, «dóńgelek ústel» jıyndary, semınar, trenıng pen konferensııalar bar. Sondaı-aq turmystyq zorlyq-zombylyq boıynsha Qaraǵandydan bastalǵan chelendj-fleshmob Shymkentte jalǵasyn taýyp, respýblıkalyq deńgeıde joǵary baǵasyn aldy.
Budan bólek, Shymkentte otbasylyq kıkiljińnen týǵan qylmystardyń aldyn alý boıynsha vedomstvoaralyq jumys toby qurylǵan. Sonyń aıasynda qalalyq prokýratýra, densaýlyq saqtaý, jumyspen qamtý, sport jáne bilim basqarmalarynyń ókilderi men úkimettik emes uıymdary birlesip, toqsan saıyn osy taqyrypqa qatysty ózekti máselelerdi talqylaıtyn jıyn ótkizip turady.
Shymkent
