Qoıylymnyń dırıjeri – Memlekettik syılyqtyń laýreaty, teatrdyń bas dırıjeri ári spektakldiń qoıýshy-dırıjeri Alan Bóribaev. Onyń jetekshiligimen «Astana Opera» sımfonııalyq orkestri men hory keremet qýat pen emosııalyq tereńdikti sheber jetkizip, kópshilikke umytylmas áser syılady.
Turandot hanshaıymnyń basty partııasyn teatrdyń prıma ánshileri, Qazaqstannyń eńbek sińirgen qaıratkerleri Jupar Ǵabdýllına men Bıbigúl Januzaq oryndady. Kalaf rólin Reseı opera sahnasynyń ártisi Mıhaıl Pırogov pen kóptegen halyqaralyq teatrlarda óner kórsetken tembri erekshe ánshi, Qazaqstannyń eńbek sińirgen qaıratkeri Medet Shotabaev somdady. Aıta keteıik, bul festıval otandyq jáne sheteldik ártisterdiń ónerin kórýge, sondaı-aq jańa esimder ashýǵa múmkindik berdi.
Kórermen alǵash ret Rolan Petıdiń eksklıýzıv balet trılogııasyn («Arlezıanka», «Bozbala jáne О́lim», «Karmen») tamashalap, Altynaı Asylmuratova qoıǵan «Uıqydaǵy arý» baletiniń tańǵajaıyp premerasyna kýá boldy. Sondaı-aq Evgenıı Chaınıkov qoıylymyndaǵy «Kapýlettı men Montekkı» operasynyń premerasy da ótti. Kópshilikke Qytaı, Fransııa jáne Reseıden kelgen tanymal juldyzdar Chjýmın Chen, Men In Fan, Marııa Ilıýshkına jáne Evan Kapıten qatysqan gala-balet erekshe áser qaldyrdy.
Is-shara aıasynda «Nomad Inspiration» biregeı jobasy da halyqtyń qyzyǵýshylyǵyn týdyrdy. «HasSak» ansambliniń jáne jobanyń qoıýshy horeografy Sultanbek Ǵumar bastaǵan teatrdyń balet trýppasy oryndaǵan aspaptyq qazaq etno-folklory men balet óneriniń sıntezi qalyń kórermenniń kóńilinen shyqty.
K.Baıseıitova atyndaǵy Kameralyq zal da qalys qalǵan joq. Jurtshylyq nazaryna vıolonchel keshteri, fortepıano solosy usynylyp, Dj.Rossınıdiń «Jibek saty» opera-býffasy qoıyldy.
Is-shara aıasynda qoıylǵan klassıkalyq týyndylar, eksperıment jobalar men ulttyq klassıkalyq shyǵarmalar festıval baǵdarlamasynyń kórkin ashyp, memleketter arasyndaǵy mádenı baılanysty nyǵaıtyp, teatr óneriniń murasyn baıyta tústi.
