Sumdyq jaıt týraly jýrnalıst Sandýǵash Dúısenova áleýmettik jelidegi paraqshasynda jazdy. Oqıǵa Jetisý oblysynyń Aqsý aýdanyna qarasty Balasaz aýylynda bolǵan.
Aqparatqa sáıkes, marqumnyń týystary 32 jastaǵy Aızat Jumanova kúıeýi Aıbar Janbolattyń qolynan qaza tapty dep otyr. Qaıǵyly oqıǵa 2 jasar qyzynyń kóz aldynda bolǵan.
- Týystarynyń sózinshe, erli-zaıyptylar arasynda janjal shyqqan. Artynsha birneshe saǵatqa sozylǵan adam sengisiz jaıttar boldy. Aızatty erekshe qatygezdikpen sabaǵan. Medısınalyq saraptama qorytyndysynan adam shoshıdy. Bas-mı jaraqaty, mı isinýi, bas súıegi negiziniń synýy, aıaq-qol men jambas súıekteriniń birneshe jerden synýy, deneniń jerge súırelý izderi. Týystarynyń paıymdaýynsha, Aızattyń qolyn arqanǵa baılap, jylqymen súıregen, – dep jazady jýrnalıst.
Jetisý oblystyq Polısııa departamenti 22 maýsym kúni saǵat 02:30 shamasynda Aızat Jumanova oblystyq aýrýhanaǵa jetkizilgenin habarlady. Dárigerler kelgennen keıin jarty saǵat ishinde ol kóz jumǵan.
Qazir sotqa deıingi tergep-tekserý amaldary bastaldy.
- Atalǵan qylmystyq is Jetisý oblysy Polısııa departamenti basshylyǵynyń erekshe baqylaýyna alyndy. Qazir kúdikti retinde jábirlenýshiniń jubaıy ustaldy. Ol ýaqytsha ustaý ızolıatoryna qamaldy, – delingen habarlamada.
Sot-medısınalyq saraptamalar taǵaıyndaldy.
