Foto: Atyrau online
«Ákimdik Atyraý qalasyndaǵy «Jeńis» saıabaǵynda UOS batyrlaryna arnalǵan 14 músin jasaý úshin demeýshiler men merdigerlerdi tartqan. Aıyptalýshy merdiger bola tura músinder jasaý kezinde qurylys normalaryn buzǵan. Nátıjesinde músinniń bireýi eki jas bala men olardyń ákesiniń ústine qulaǵan», dep aqparat taratty sottan.
Sot aıyptalýshynyń áreketin Qylmystyq kodektiń 279-babynyń 1-bóligimen (Sáýlet, qala qurylysy jáne qurylys qyzmeti salasyndaǵy qaǵıdalardy nemese normatıvterdiń talaptaryn abaısyzda adam ólimine nemese ózge de aýyr zardaptarǵa ákep soqqan buzý) qaıta saralady. Al aıyptalýshynyń kinási kýágerlerdiń aıǵaqtarymen, beınejazbalarmen, sarapshynyń qorytyndysymen dáleldengen.
Prokýror aıyptalýshyny 4 jylǵa bas bostandyǵynan aıyrýdy usyndy. Al, sottalýshy kinásin moıyndamady. Jábirlenýshi tarap aıyptalýshyǵa qatań jaza taǵaıyndaýdy surady.
«Sot úkimimen B. esimdi azamat Qylmystyq kodektiń 279-babynyń 1-bóligimen kináli dep tanyldy. Oǵan sáýlet, qala qurylysy jáne qurylys qyzmetimen aınalysý quqyǵynan 3 jyl, bas bostandyǵyn 3 jyl merzimge aıyrý jazasy taǵaıyndaldy. Raqymshylyq jasaý aktisi negizinde 1 jyl 6 aı merzimge bas bostandyǵynan aıyrý túrindegi túpkilikti jaza belgilendi. Sottalýshydan árbir jábirlenýshiniń paıdasyna moraldyq zııannyń ótemaqysy retinde 10 mln teńgeden, emdelýge jumsalǵan shyǵyndar óndirip alyndy», dep málimdedi atalǵan sottan.
Sot úkimi zańdy kúshine engen joq.
