Ańyzdarǵa arqaý bolǵan, tastaryndaǵy petroglıfterimen únsiz syr shertetin, arasan bulaqtarymen shıpa darytqan, kóne órkenıetterdiń izimen tarıh tunǵan bul ólkeden shyqqan áýletke tereń dúnıetanym, qajyrly eńbek, tózimdilik pen názik te kórkem talǵam daryǵan. Kórmege áýlettiń birneshe býyny – aǵa urpaqtan bastap shóberelerge deıin qatysyp otyr. Olardyń qatarynda soǵys ardageri, sýretshi ári ónertapqysh Ahmetqalı Qasymbekov jáne onyń urpaqtary: balalary Bolat, Manarbek, Janargúl, Begaıym, nemereleri Aıǵanym Dýlatqyzy, Gúlmıra Appasova, Nazerke Manarbekqyzy, Ilııas Slıamǵazy, О́rken Qasymbekov, Ádemi Nurtileý, sondaı-aq shóbereleri – Hamza Dýlatuly men Alen Izbasarov bar. Ekspozısııa qoldanbaly óner, músin, zergerlik óner jáne dızaın salalaryndaǵy týyndylardy qamtıdy. Áýlet músheleriniń shyǵarmashylyǵy sheberlik deńgeıiniń joǵary bolýymen, stıldik san alýandyǵymen jáne materıalǵa degen tereń qurmetimen erekshelenedi. Kórmege kelýshiler kórkem tildiń ýaqyt aǵymyndaǵy evolıýsııasyn, ár avtordyń dara shyǵarmashylyq qoltańbasyn, sondaı-aq otbasylyq dástúrlerdiń ár týyndyda qalaı kórinis tabatynyn tamashalaı alady.
Á.Qasteev atyndaǵy Memlekettik óner mýzeıinde Qasymbekovter áýletiniń shyǵarmashylyǵyn tanystyrýǵa arnalǵan «О́nerli áýlet órnegi» kórmesinde músinshi Bolat Qasymbekovtiń óneri erekshe oryn alady. Nazarǵa avtordyń ár kezeńdegi – erterektegi jáne keıingi jyldardaǵy jumystary usynylǵan. Olardyń qatarynda: «Qorqyt» (2013), «Abyz ata» (qola, 2012), «Alma ustaǵan bala» (gıps, 2012), «Abaı Qunanbaıuly» (gıps, 2019), «Dinmuhamed Qonaev» (gıps, 2020), «Shahmat fıgýralary» (qola, 2023–2024), sondaı-aq 2024–2025 jyldary jańadan qoladan quıylǵan týyndylary bar. Kórmede Almaty, Uzynaǵash, Jarkent jáne Mańǵystaý qalalarynda ornatylǵan monýmentaldy shyǵarmalardyń fotomaterıaldary qoıylǵan: «Eltindi batyr» (2006), «Shoqan Ýálıhanov» (2008), «S.Nurmaǵambetov» (2013), «Baǵaı batyr» (granıt, 2004) jáne basqalar.
«О́nerli áýlet órnegi» — bul tek kórkem jetistikterdi ǵana emes, sonymen birge otbasylyq dástúrlerdiń, rýhanı qundylyqtar men ónerge degen súıispenshiliktiń qýatyn beıneleıtin shyǵarmashylyq áýlettiń tiri shejiresi. Kórme mádenıettegi sabaqtastyqtyń mańyzyn eske salyp, ulttyq kórkem murany saqtaý men damytýǵa shabyt beredi», deıdi «Qazaqstan beıneleý óneri» bóliminiń ári kórme jetekshisi G.Jubanova.
ALMATY
