Foto: gov.kz
Komıtet málimetinshe, osy jyldyń alǵashqy 6 aıynda elimizde 64 529 qylmystyq quqyq buzýshylyq tirkelgen. Bul ótken jyldyń sáıkes kezeńimen salystyrǵanda 4 463-ke az, paıyzǵa shaqqanda 6,5% tómendegen.
Sanat boıynsha jiktesek, asa aýyr qylmystar sany - 58,4%-ǵa, ortasha aýyrlyqtaǵy qylmystar - 14%-ǵa, onsha aýyr emes qylmystar - 13,4%-ǵa azaıǵan. Dese de aýyr qylmystar sany 2,4%-ǵa óskeni anyqtalǵan.
Al uryp-soǵý, usaq urlyq, jol erejesin buzý syndy quqyq buzýshylyqtar jalpy kórsetkishtiń 20 paıyzyn qurap otyr. Quqyqtyq statıstıka jáne arnaıy esepke alý jónindegi komıteti jaqynda Ákimshilik quqyq buzýshylyq týraly kodekstiń keıbir baptarynyń qylmystyq quqyq buzýshylyq sanatyna aýysýy bul sanattaǵy buzýshylyqtardyń azaıýyna yqpal etkenin atap ótken.
Sondaı-aq, urlyq faktileri 27,6%-ǵa tómendegen. Máselen, 2024 jyly alty aıda 16 309 urlyq tirkelse, osy jyly 11 809 derek tirkelgen.
Tonaý 34%-ǵa (870 faktiden 574 faktige deıin), qaraqshylyq 38,6%-ǵa (70-ten 43-ke deıin), adam óltirý –18,8%-ǵa (324-ten 263-ke deıin) , adam óltirýge oqtalý –32,1% -ǵa (78-den 53-ke deıin) buzaqylyq –23%-ǵa (892-687) zorlaý –11,7%-ǵa (256-dan 226-ǵa deıin) azaıǵan.
Jarty jylda jalpy alaıaqtyqqa qatysty 22 812 jaǵdaı tirkelgen. Bul kórsetkish ótken jylmen salystyrǵanda 168 jaǵdaıǵa nemese 0,7%-ǵa artyq.
Internettegi alaıaqtyq kerisinshe qarqyn alǵan. Internettegi alaıaqtyq - 24,7%-ǵa ósip, 9 936-dan 12 390 jaǵdaıǵa jetken. Azamattardyń basym bóligi saıttardyń, qońyraýlardyń jáne chattardyń qurbanyna aınalyp jatyr.
Komıtet qylmyskerler áleýmettik jelilerdi, onlaın jarnamalardy, jalǵan jetkizý qyzmetterin paıdalanatynyna, tipti bank shottaryn da qoldan jasaıtynyna nazar aýdarǵan.
