Foto: azh.kz
Sonyń biri sońǵy jyldary eldegi mádenıet oshaqtary men teatrlardyń jerleý bıýrosyna aınalyp bara jatqandaı áser qaldyrýy. A.Balaeva munyń oılanatyn másele ekenin eske salyp, endigi rette jazýshylar odaǵy da eskeretinine senim bildirdi.
«Buryn Almaty qalasy ákimdiginde qyzmet etip júrgen kezimde on kúnniń ishinde birneshe tanymal tulǵa ómirden ótti. Sol kezde teatr jetekshisi Talǵat Temenov qońyraý shalyp, akterler kúndiz – qoshtasý rásiminde, keshke – spektaklde júretinin, báriniń kóńil kúıi, eńsesi túsip ketkenin aıtty. «Qasterli orda jerleý bıýrosyna aınalyp ketken joq pa?» degen qynjylysyn bildirdi. Bul áńgime áli kúnge deıin esimde. Shynynda da, biz shyǵarmashylyq adamdardyń moraldyq-psıhologııalyq jaǵdaıyn eskermeıtin sekildimiz. Ekinshiden, keńestik kezeńnen qalǵan dástúrlerdi sol qalpynda búginge deıin jalǵastyra berý qanshalyqty durys?! Árıne, óner men ádebıetke eńbegi sińgen jandardyń esimi umyt qalmaýy kerek. Biraq olardyń rýhyn ulyqtaý men qoshtasý rásimderiniń formaty men ótetin orny – qoǵam men mádenıet úshin qaıta qaralatyn kezeńge jetkendeı. О́ner ordasy – rýhanı bıiktik pen shyǵarmashylyqty tý etetin kıeli meken. Alaıda eger onyń sahnasy jıi qaraly jıyndar ótetin orynǵa aınalsa, bul – alańdatarlyq jaǵdaı. Mundaı úrdis bir jaǵynan kórermen men akter, sahna men sana arasyndaǵy baılanysty álsiretedi» degen oıyn ortaǵa salǵan mınıstr máseleni emosııamen emes, parasatpen qabyldaıtyn ýaqyt jetkenin jetkizdi.
Qazirgi tańda ákem-teatrǵa balanǵan M.Áýezov jáne atyndaǵy Qazaq ulttyq drama teatrynda jáne N.Sas atyndaǵy Memlekettik akademııalyq orys balalar men jasóspirimder teatrynda jóndeý jumystary júrip jatyr. 2026 jyly ǵasyr toıyn atap ótetin Áýezov teatrynyń tarıh tolqynynda jutylmaǵan beınesin saqtap qalý, ózgede teatrlardyń ishki mazmunyn ilgeriletý qoǵam suranysy.
«Elimizdegi mádenıet nysandarynyń basym bóligi kúrdeli jóndeýdi qajet etedi. Bul – jyldar boıy qordalanǵan másele. Biz bul mindetti tek bıýdjet esebinen emes, demeýshiler men mesenattardy tarta otyryp, mádenıetti jańǵyrtýdy búkil qoǵamnyń ortaq isine aınaldyrýǵa tyrysyp kelemiz.
Al N.Sas atyndaǵy Memlekettik akademııalyq orys balalar men jasóspirimder teatry ǵımaratynyń rekonstrýksııasy Almaty qalasy ákimdiginiń qoldaýymen 2025 jyldyń naýryz aıynan bastap júrgizilýde. Joba qurylys-montajdaý jumystaryn, materıaldyq-tehnıkalyq bazany tolyq jańartýdy jáne jalpy aýdany 10 560 sharshy metr bolatyn jańa keńeıtilgen ǵımaratty qamtıdy. Onda 200 oryndyq kameralyq sahna, óndiristik sehtar, ákimshilik jáne qoıma úı-jaılary ornalasatyn bolady.
Sondaı-aq rekonstrýksııa barysynda teatr jabdyqtarynyń 100%-y jańartylmaq. Atap aıtqanda, sahna mehanıkasy, akýstıka, dybys, jaryq, beıne júıeleri túgel jańartylady», dedi Aıda Balaeva.
Qazaq ulttyq opera jáne balet teatry qurdymǵa ketip bara ma?
Suhbat aıasynda vedomostvo basshysy teatrdy basqaryp otyrǵan Aınur Kópbasarovanyń qyzmetine qatysty saýaldardyń da núktesin qoıdy.
«Áleýmettik jelilerde aıtylyp júrgen «Kópbasarova meniń qurbym, teatrdy qurdymǵa ketirip jatyr» degen syndar – negizsiz. Bul jerde basty másele – kásibılik pen nátıje.Iá, Aınur Kópbasarovaǵa qatysty shaǵymdar túskeni ras. Saralap qarasaq, bizge túsken 14 shaǵymnyń 8-i onyń qyzmetine tikeleı qatysty. Alaıda olar negizinen teatrdyń shtattyq bılet tekserýshilerinen kelip túsken. Bul qyzmetkerler tek is-sharalar kezinde jumys istegen. Basqa teatrlarda mundaı mamandar maýsymdyq nemese kelisimshart negizinde ǵana qyzmet atqarady. Teatr maýsymy aıaqtalǵan soń bul shtat qajet bolmaı qalady. Sondyqtan atalǵan ózgerister teatr qurylymynyń qaıta jasaqtalýyna baılanysty qoldanystaǵy zańnamaǵa sáıkes júrgizildi», dep atap ótti mınıstr.
