Foto: gov.kz
Joba bıyl tamyz aıynda bastalyp, 2028 jylǵa deıin júzege asyrylady. Jańa aınalma joldyń salynýy oblystyń logıstıkalyq áleýetin arttyryp, Semeı qalasynyń kólik júktemesin azaıtýǵa múmkindik beredi. Oblys ortalyǵyndaǵy aspaly kópir arqyly jylyna 700 myńǵa jýyq kólik ótedi.
Berik Ýálı jobaǵa qatysty jumystardyń bastalyp ketkenin aıtty.
«Qazaq-qytaı kásiporyndarynyń birlesken konsorsıýmy negizinde qol qoıylǵan kelisimge saı bıyl tamyz-qyrkúıek aılarynda jobanyń tehnıkalyq-ekonomıkalyq negizdemesi jasalady. Al qazan, qarasha aılarynda aınalma joldyń aldyn ala jobasy ázirlenip, kópirler men jol aıyryqtary ákimdikpen kelisiledi. Qarasha, jeltoqsan aılarynda jumys jospary, qurylysqa daıyndyq ákimdikpen kelisiledi. Sodan keıin baryp Semeı qalasyn aınalyp ótetin avtojol qurylysy bastalady. Bul kelisim bizdiń elder arasyndaǵy uzaq merzimdi ári ózara tıimdi yntymaqtastyqtyń negizine aınalyp, Eýrazııadaǵy halyqaralyq kólik dálizderiniń damýyna aıtarlyqtaı úles qosatynyna senimdimin», dedi Abaı oblysynyń ákimi.
Semeıdegi aınalma joldy Astanadaǵy LRT qurylysyna qatysyp jatqan kompanııa salady.
«Bizdiń kompanııa bul jobaǵa byltyrdan bastap aralasyp, birqatar jaqsy nátıjelerge qol jetkizdik. Osy tájirıbemizdi Semeı qalasyndaǵy aınalma jol qurylysy kezinde iske asyramyz dep oılaımyn» dedi Chjoý Haıveı.
