Sýretti túsirgen – Aqádil RYSMAHAN
Odan bólek, Talas sekildi transshekaralyq ózenderde sý tapshylyǵy baıqalatyn jyldardy da kórdik. Munyń bári sharýalardy jańashyldyqqa bet burýǵa úndep turǵandaı edi.
Keıingi birneshe jyldyń bederinde jambyldyq sharýalar jańa tehnologııaǵa bet buryp, tamshylatyp sýarý ádisine kóshti. Birshama ýaqyt buryn óńirde tamshylatyp sýarý júıesin shyǵaratyn zaýyt ta iske qosylǵan. Aımaqta mundaı irgeli kásiporynnyń jumys isteýi – sý únemdeý tehnologııasyna basymdyq berýdiń alǵysharty.
2023 jyly sý únemdeý tehnologııalarynyń alańy 40 myń gektardy qurasa, keıingi jyldary bul kórsetkish edáýir artqan. Sebebi jaýapty mamandar bul jumysty irgeli sharýa qojalyq basshylaryna keńinen túsindirýden jalyqqan emes. О́ńir basshysy Erbol Qarashókeevtiń bastamasymen tamshylatyp jáne jańbyrlatyp sýarý júıesin engizý boıynsha qolǵa alynǵan jumys udaıy júrgizilýde. О́ńirde sý únemdeý tehnologııalary 2024 jyly taǵy birneshe myń alańǵa engizilip, jalpy kórsetkish 55,4 myń gektarǵa jetkizilipti. Osy jyly jańa tehnologııany qoldaný arqyly egis alqabynyń jalpy alańyn 89,2 myń gektarǵa deıin jetkizý kózdelgen.
«Memleket basshysy Qasym-Jomart Toqaev sý resýrstaryn utymdy jáne ornyqty basqarýdyń mańyzyn udaıy aıtyp júr. Rasynda, bul – agroónerkásiptik keshendi damytýǵa jáne halyqtyń ál-aýqatyn jaqsartýǵa tikeleı áser etetin strategııalyq mańyzdy baǵyttyń biri. Sondyqtan alqaptarǵa sý únemdeý tehnologııalaryn engizýdiń mańyzy zor deýge tolyq negiz bar. О́ńirde sý nysandarynyń ınfraqurylymyn jańǵyrtý jáne sý únemdeý tehnologııasyn engizý boıynsha aýqymdy jumystar atqarylyp jatyr. Qazirge deıin zamanaýı tehnologııa 66,5 myń gektar aýmaqqa engizilgen. Aldaǵy ýaqytta bul kórsetkishti eseleýge tolyq múmkindik bar», deıdi óńir basshysy Erbol Qarashókeev.
Oblystyq aýyl sharýashylyǵy basqarmasynyń basshysy Qaırat Kóshenovtiń aıtýynsha, «KAZ Kaspıı GIDRO Selhoz Tehnologııa» zaýyty jylyna 14 myń gektarǵa deıingi alqapty qamtıtyn qurylǵylar óndire alady. Sonymen birge jańbyrlatyp sýarý qondyrǵysy men tamshylatyp sýarý júıelerin óndiretin taǵy eki jobany iske asyrý boıynsha naqty jumystar qolǵa alynǵan.
Jambyl oblysynda sý únemdeý tehnologııalaryn engizý boıynsha atqarylyp jatqan jumys qarqyny kóńil kónshitedi. Birer jyl buryn bul iske úrke qaraǵan sharýalar kári qurlyqtan jetken jańashyldyqtyń paıdasyn tereńnen túsingen syńaıly.
Jambyl oblysy
