Sol sııaqty, qazaqta da neshe túrli qarǵys bar. Sonyń biri adamdar kóp aıtatyn ári eń jaman qarǵys – «Betiń tilińgir». Bul qarǵys týraly tanymal tarıhshy Tursynhan Zákenuly «Egemen Qazaqstan» gazetiniń 2020 jylǵy 28 tamyz kúngi sanynda jarııalanǵan «Jeldi qýǵan joǵalar, joldy qýǵan ońalar» atty maqalasynda: «Ejelgi ǵun zamanynda memleket jáne jekeniń múlkine qol salǵandardyń betin tiletin bolǵan. Qazaqta «betiń tilińgir» degen sodan qalǵan» dep jazsa, ataqty ǵalym, tanymal etnolog, passıonarlyq teorııasynyń avtory Lev Gýmılev qazaq tilinde jaryq kórgen «Hundar» (Almaty, 1998) atty eńbeginde: «Ejelgi hundardyń ózindik ádettegi (azamattyq) huqyq júıesi de bolǵan, al qytaılar: «olardyń zańy jeńil ári oryndaýǵa qolaıly» dep atap ótedi. Aýyr qylmys jasaý, onyń ishinde qarý-jaraq jalaqtatý ólim jazasyna kesilse, urlyq isteý – dúnıe-múlikti ǵana emes, urynyń otbasyn qosa tárkileý arqyly jazalanǵan. Al usaq qylmys jasaǵandardyń beti tilinetin bolǵan», dep jazypty (Hundar. Almaty: «Qazaqstan», 1998. – 85-b).
