Sýretti túsirgen – avtor
Tot baspaıtyn qańyltyrdan jasalǵan, sary tústi qazaqy oıýlarmen qaptalǵan dombyra kádimgi qazaqtyń ulttyq aspabynan aınymaıdy eken. «Dombyrany túrli aǵashtan jasaǵandy bilemiz ǵoı. Temirden jasalǵan dombyrany alǵash kórýim. Bul dombyrany jasaýǵa qanshama eńbek ketti deseńizshi... Temir qaldyǵyn qabyldaıtyn jerden kórip qalyp, ala almaı kettim. Satatyn qojaıyny bolmaı qaldy. Biraq «dombyranyń orny ol jer emes edi ǵoı» dep ishteı qynjyldym» dep jazypty Nurlan.
– Nurlannyń jazbasyn kórip qalyp, birden oqıǵa ornyna asyqtym. О́zim mýzeı qyzmetkeri bolǵandyqtan, erekshe jádigerdiń baǵasyn bilem ǵoı. Metall qabyldaýshylar bul dombyraǵa jurttyń nazary aýa bastaǵanyna alańdady ma, áýeli «qojaıyny joq» degen syltaýmen satýdan bas tartty. Ortaǵa tártip saqshylaryn aralastyryp, erekshe aspapty aqyry satyp aldym. Qujatyn toltyryp, Oral qalasyndaǵy dombyra mýzeıine tapsyrǵaly otyrmyn, – deıdi Batys Qazaqstan oblystyq tarıhı-ólketaný mýzeıiniń qor saqtaýshysy Muhtar О́tes.
Árıne, metall qabyldaıtyn jerdegi jigitterge eshkimniń ókpesi joq. «Bul qazaqtyń kıeli aspaby ǵoı» dep joǵary ilip qoıǵan eken, soǵan rıza boldym!» dep Muhtardyń ózi aıtyp otyr. Tek ókinishtisi – bul dombyrany kim jasaǵan, ıesi kim, tarıhy qandaı? – ázirge osy saýaldardyń jaýaby tabylmaı tur.
Erekshe dombyrany biz de qolymyzǵa ustap kórdik. Metaldan jasalǵanyna qaramastan jep-jeńil, ádettegi aspaptan aýyrlyǵy shamaly. О́lshemderi de dál sondaı. Qos ishegi saqtalmaǵanymen, pernesi taǵýly, kezinde qoldanylǵany kórinip tur. Dombyra óte sheber jasalǵan, óner týyndysy dese bolǵandaı.
Buıyrsa bul jádiger Oral qalasynda byltyr ashylǵan Dombyra mýzeıindegi tarıhı dombyralar kolleksııasyna qosylatyn boldy.
Batys Qazaqstan oblysy
