«Aqsaı Jýaly» zaýyty iske qosyldy

Jyl basynda óńirde eki birdeı zaýyt ashylsa, bul jumys jyl ortasynda da laıyqty jalǵasyn tapty. Sáýirdiń sońyn ala Shý aýdanyndaǵy «Jibek joly» arnaıy ekonomıkalyq aımaǵynda iri metallýrgııalyq zaýyt qurylysy bastaldy. Odan bólek, óńirde túrli baǵyttaǵy birneshe óndiris oshaǵy iske qosyldy. Jańadan boı kótergen zaýyttar jergilikti turǵyndardy jumyspen qamtýǵa nıet bildirip otyr.

Jalpy, óńirge sheteldik jáne otandyq ınvestorlardyń kelýi keıingi kezde aıtarlyq­taı qarqyn aldy. Jyl basynda Turar Rysqulov aýdanynda saǵatyna 3 myń lıtr mıneraldy sý shyǵaratyn kásiporyn iske qosylsa, sol jumystyń jalǵasyndaı bolyp, birer kún buryn Jýaly aýdanynda «Aqsaı Jýaly» mıneraldy sý kásiporny jumysyn bastady. Jańa zaýyt ishki naryqty qamtýǵa basymdyq berip otyr.

«Mundaı ilkimdi jobalar óńirdiń ekonomıkalyq kórsetkishin ústemelep qana qoımaı, jergilikti halyqtyń ál-aýqatynyń artýyna yqpal etedi. Jańa kásiporyn­nyń ashylýy arqa­syn­da aýyl­da jańa jumys oryn­da­ry paıda bolady. Nátı­je­sin­de, tutas qazaqtyń altyn be­sigine aınalǵan eldi mekender damýdyń dańǵyl joly­na túsedi. Osy turǵydan alǵan­da, atqarylyp jatqan ju­mystyń aýqymy keń dep oı­laı­­myn. Birinshi kezekte biz jer­gilikti ónimge degen sura­nysty arttyrýǵa barynsha jaǵdaı jasaýymyz kerek. Syrttan keletin taýarǵa degen táýeldilikti múmkindiginshe azaıtý úshin osyndaı qadamǵa barǵan jón dep bilemin. Sonda ǵana aýyl turǵyndary týǵan jerinde atqarylyp jat­qan jumystyń nátıjesimen maqtana alady. О́ndiristik ınfraqurylymdy damytý men óńirge ınvestısııa tartý – Memleket basshysynyń biz­ge júktegen negizgi mindeti­niń biri. Sondyqtan bul baǵyt­taǵy jumysty barynsha sapaly atqaryp, toqtaýsyz júr­gizemiz», deıdi óńir basshysy Erbol Qarashókeev.

Resmı derekke júgin­sek, Jýalydaǵy ilkimdi joba jeke ınvestısııa esebinen júze­ge asyrylyp otyr. Jańa ón­diris oshaǵyn salý úshin 400 mln teńge qarjy jumsal­ǵan. Zamanaýı qurylǵylarmen jab­dyqtalǵan kásiporynnyń óndiristik qýaty táýligine 80 tonna mıneraldy sý óndirý­ge múmkindik beredi. Jergilik­ti atqarýshy bılik ókilderi­niń aıtýynsha, kásiporyn bas­shy­lary bastapqy kezeń­de 15 azamatty jumysqa qa­byldaǵan.

Mıneraldy sýdy oblys aýmaǵynan bólek, Astana, Almaty, Shymkent qalalary­na jáne Qyzylorda, Atyraý, Batys Qazaqstan, Mańǵys­taý oblystary men ózge de óńir­lerdiń naryǵyna shyǵarý jos­parlanyp otyr.

Jaýapty mamandardyń aıtýynsha, osy jyly jalpy quny 175 mlrd teńgeni qu­raıtyn 30 ınvestısııalyq jobany júzege asyrý jos­parlanǵan. Ilkimdi jobalar tolyqqandy iske asqanda, óńir­de 1 143 jańa jumys or­ny ashylmaq. Osy jyldyń al­ǵash­qy jartysynda negizgi kapıtalǵa salynǵan ınves­tısııa kólemi 301,8 mlrd teń­geni quraǵan. Osylaısha, ót­ken jyldyń sáıkes kezeńimen salystyrǵanda, kórsetkish 48,1%-ǵa artqan.

Jambyl oblysy,

Jýaly aýdany