Abaıdyń týǵan kúni – 10 tamyz elimizde keńinen toılanyp jatyr. Aımaq boıynsha jyl boıy uly oıshylǵa arnalǵan shamamen 300 is-shara ótkiziledi. Barlyq sharalar Abaıdyń shyǵarmashylyǵy men ıdeıalaryn saqtaý jáne nasıhattaýǵa baǵyttalǵan.
Aqynnyń mereıtoı kúni Qaraǵandyda Abaı eskertkishine gúl shoqtary qoıyldy. Saltanatty rásimge oblys ákimi Ermaǵanbet Bólekpaev, Qazaqstan halqy Assambleıasynyń, mádenıet, ǵylym jáne qoǵam ókilderi qatysty.
– Bul men úshin úlken mereke. Men Abaıdy óte jaqsy kóremin: ár óleńi, ár sózi júregime jetedi. Ústelimde onyń kitaby jatady, jáne men Abaıdy oqyǵan saıyn, ol biz týraly, bizge arnap jazǵandaı áser alamyn. Bizde Abaıdaı uly tulǵalardyń bolǵanyna qýanamyn ári maqtanamyn, – dedi akademııalyq máseleler jónindegi prorektor, Ábilqas Saǵynov atyndaǵy tehnıkalyq ýnıversıtettiń ókili Bekbolat Núsipbekov.
Eskertkish janynda uly aqynnyń jyrlary oqylyp, qazirgi tyńdarmannyń júregine jetti.
Mereıtoı qarsańynda oblysta aqynnyń ómiri men murasyna arnalǵan kórmeler, dóńgelek ústelder, ǵylymı-tájirıbelik konferensııalar, jyr músháıralary, aıtystar men teatrlandyrylǵan qoıylymdar uıymdastyryldy. Bul tek ótkendi eske alý ǵana emes, Abaı bastaǵan rýhanı dıalogty jalǵastyrýdyń kórinisi boldy.
Merekelik is-sharalar oblystyń barlyq aýmaǵyn qamtıdy. Búginde Qaraǵandy oblysynda Abaı esimi qalaǵa, aýdanǵa, eki aýyldyq okrýgke, 80-nen astam kóshege, 9 mektepke berilgen. Sondaı-aq Qaraǵandyda, Shahtınskide jáne Abaı qalasynda úsh eskertkishi bar.
Abaı urpaqqa poezııalyq jáne mýzykalyq muradan bólek, tereń fılosofııa qaldyrdy. Onyń «Qara sózderi» búgin de ózektiligin joǵaltpaı, bilimge, ádildikke jáne rýhanı jetilýge úndeıdi.
– Búgin biz Abaı eskertkishine gúl qoıý rásimine qatystyq. Munda turyp, bul oqıǵanyń mańyzyn tereń sezindik. Abaı Qunanbaıuly – uly adam, onyń esimi men murasy qazir de halyq jadynda, – dedi Qaraǵandy kooperatıvtik kolledjiniń stýdentteri Darına Ývalıeva men Kamıla Tómenbaeva.
