Aıtysqa elimizdiń ár túkpirinen kelgen on aqyn qatysty. Aldymen irikteý saıysynda aqmolalyq Erkin Sovethan men qostanaılyq Saltanat О́tepbaeva áp-ádemi qyz ben jigit aıtysyn jasady. Qos aqyn shama-sharqynsha qurdastyq qaljyńmen, ádemi ázilmen ádiptelgen sóz semserin siltesti. Abaıdyń mol murasy, naqyl sózderi aıtyldy. Munan soń astanalyq Toba О́telbaı men ereımendik Jańyljan Joldymurat sóz synasty.
Kórermen Soltústik Qazaqstan oblysynyń ókili Berdenbek Myrzat pen Sáttibek Serikbolattyń aıtysyna razy boldy. Ásirese mektep oqýshysy Sáttibektiń jyr semseriniń jarqyldaǵany-aı. Tapqyr sóz, baltalasa buzylmaıtyn uıqas qana emes, bilim men maǵyna ústegen jyr shýmaqtary jipke tizgen marjandaı jarqyrap, oı tuńǵıyǵyna tartqany bar. Almatylyq Nurbolat Serik pen kókshetaýlyq Muhamed Qońqaev ta Býrabaı baýraıyndaǵy jyr jarysynyń júırikteri desek, artyq aıtpaǵandyǵymyz. Ásirese Arqaǵa tanymal aqyn Muhamedtiń taban astynan taýyp aıtqan qarymta jaýaptary kóptiń kóńilinen shyǵyp jatty. Ereımendik Erlan Dáýlet pen Arqalyqtan kelgen Batyrlan Saǵynaı jyr dodasynyń shyn júırikteri edi.
Irikteý saıysynda jastyqtyń býymen sál qıys basqan, súringen tustary da bolmaı qalǵan joq. Keıingi tolqyn sahna mádenıeti, sóz kıesi deıtin qasıetti uǵymdardy sanasyna sińire júrsin dep aıtýǵa májbúrmiz. Bul tarapta jónsiz sózdiń júıesi jeke basqa tıisý tóńireginde. Abaı álemi týraly taqyryp az emes edi, oı da on san. Áıtse de, qalqıǵan qulaqty, basty, shashty ájýalaý kelisimsiz edi. «Kósh júre túzeledi», sahnada ysylar, tájirıbe jınaqtar, keıin bul abyroı ápermeıtin jeńil sózdi aýzyna almas dep topshyladyq.
Qorytyndy aıtys Býrabaı baýraıyndaǵy Botaı ashyq aspan astyndaǵy mýzeıinde ótti. Batyrlan Saǵynaı men Sáttibek Serikbolattyń aıtysy shymyr da shıraq shyqty. Ásirese Batyrlan aqyn tanym deńgeıiniń joǵary, biliminiń bekemdigin aıqyn ańǵarta bildi. Kórermen aıtys áleminiń jańa juldyzy – Sáttibektiń de sátti qadamyna rızashylyq tanytty. Azýly aqyn Batyrlannan yqpaı, qapysyn taýyp qarymta sóz qaıtara bilgen jas aqyn aqyr sońynda aǵasyna jol beretinin aıtyp, izettilik kórsetti. Munysy ózine jarasyp turdy. Aǵa syılaı biletin keıingi urpaqtyń kishipeıildigi qandaı jarasymdy. Muhamed Qońqaev pen Erlan Dáýittiń aıtysy da Abaı álemine boılap kirgen salmaqty aıtys sanatynda boldy.
– Aıtysqa qatysqan aqyndardyń bári derlik Abaı murasyn ulyqtaı bildi, – deıdi aıtystyń júrgizýshisi, belgili aıtysker aqyn, halyqaralyq aıtyskerler men jyrshy-termeshiler odaǵynyń Aqmola oblystyq fılıalynyń tóraǵasy Qudaıberli Myrzabek, – árqaısysy óz tanymyndaǵy Abaı beınesin hal-qaderinshe aıtyp berdi.
Qazylar alqasynyń uıǵarymy boıynsha bas báıgege Batyrlan Saǵynaı ıe bolsa, birinshi orynǵa Muhamed Qońqaev kóterildi. Ekinshi orynǵa Erlan Dáýlet laıyq dep tanyldy. Úshinshi oryn Sáttibek Serikbolat pen Saltanat О́telbaevanyń enshisinde.
Aqmola oblysy,
Býrabaı aýdany
