Densaýlyq saqtaý mınıstri Aqmaral Álnazarovanyń aıtýynsha, memleketimizdiń basty basymdyqtarynyń biri – halyqtyń densaýlyǵyn qorǵaý. «Bizdiń maqsatymyz – 2029 jylǵa qaraı qazaqstandyqtardyń ortasha ómir súrý uzaqtyǵyn 77 jasqa jetkizý. Bul mejege jetý qoljetimdi. Jyl saıynǵy dınamıkada oń kórsetkishter baıqalady. 2024 jyldyń qorytyndysy boıynsha halyqtyń ortasha ómir súrý uzaqtyǵy alǵash ret 75 jastan asty», dedi mınıstr.
Mınıstrlik málimetinshe, ótken jyly ana ólimi kórsetkishi 12 paıyzǵa tómendep, tarıhı mınımýmǵa jetti. Sonymen qatar neonataldyq ólim 20 paıyzǵa, sábı ólimi 11 paıyzǵa, al bala ólimi 8 paıyzǵa azaıdy.
Mundaı oń nátıjeler jańa tehnologııalardy engizýmen de tikeleı baılanysty. 2024 jyly elimizde alǵash ret «Fetaldy medısına» ádisi qoldanylyp, 71 jatyrishilik ota jasaldy. Sonyń arqasynda 96 náresteniń ómiri saqtalyp qaldy. Budan bólek, jańa týǵan sábıler hırýrgııasy da qarqyndy damyp keledi: 2025 jyldyń alǵashqy jartyjyldyǵynda týa bitken damý aqaýlary bar 600 nárestege ota jasalǵan.
«Memleket basshysy men Úkimettiń qoldaýynyń arqasynda biz halyq densaýlyǵyn jaqsartýǵa baǵyttalǵan sharalardy júıeli túrde júrgizip kelemiz», dep atap ótti Aqmaral Álnazarova.
