Zerendi aýdanyndaǵy «Vıktrovka» seriktestiginiń 23,6 myń gektar jeri bar. Onyń 17,8 myń gektary – egistik alqaby. 6,8 myń gektar jaıylym tuıaqkes bolmaǵan, alýan túrli shópke tunyp tur. Egistik alqaptarda bıdaı, arpa, suly, burshaq daqyldary, zyǵyr jáne mal azyǵyna qajetti shóp egiledi. Dıqandar tehnıka parkin saqadaı saı etip daıyndapty. Astyq keptirgish qurylǵylar, mehanıkalandyrylǵan qyrman da daıyndalǵan. Seriktestik memleket tarapynan kórsetilip jatqan kómekke razy. Kóktemgi egis, kúzgi oraq kezinde jeńildetilgen baǵamen qajetti janar-jaǵarmaıyn alady. Sharýashylyq basshysy Vıtalıı Goncharovtyń aıtýynsha, bıyl alǵash ret qant qyzylshasyn egipti.
«Tańsyq sharýany bastadyq, – deıdi Vıtalıı Goncharov. – Qara jerdiń qoınyna dán ekken dıqan jemisti eńbegine saı nátıjeden de dámeli bolady emes pe, gektarynan 30 tonnadan ónim jınasaq dep otyrmyz».
«Jýravlevka-1» seriktestigi 122,8 myń gektar alqapqa dándi, maıly, burshaq daqyldary, kartop jáne kókónis ekken.
«Egin oraǵy óte jaýapty naýqan, – deıdi sharýashylyq basshysy Qýantaı Sultanov, – memlekettik qoldaýdyń arqasynda mashına-traktor parkiniń 90%-yn jańarttyq. Sý jańa 64 kombaınymyz bar. «Keń dala» baǵdarlamasymen 6 mlrd teńgeden astam qarajatqa tyńaıtqysh, janar-jaǵarmaı, tehnıka satyp aldyq. Bıyl egin bitik ósti. О́tken jyly gektaryna 18 sentnerden ónim alsaq, bıyl 23 sentnerden buıyrar dep dámelenip otyrmyz».
Aýyl sharýashylyǵy basqarmasy basshysynyń orynbasary Renat Qasenovtiń aıtýynsha, óńirdegi egin 5,3 mln gektar alqapta ósirilip jatyr. Alqap kólemi 2024 jylmen salystyrǵanda 128 myń gektarǵa kóp.
«Aldyn ala boljamǵa qaraǵanda, egistik alqaptardyń 80%-yndaǵy jaǵdaı jaqsy. Agrotehnıkalyq sharalar ýaqytyly júrgizilgen. 4,2 mln gektar jerde aramshópke qarsy óńdeý jumysy júrgizildi. Topyraqqa 273 myń tonna mıneraldy tyńaıtqysh sińirildi. Osy aýqymdy jumystyń barlyǵy jeńildetilgen nesıe berý baǵdarlamalarynyń arqasynda atqaryldy. – deıdi Renat Qasenov. – Bıyl 905 fermer 116 mlrd teńgeden astam qarajat kóleminde qoldaýǵa ıe boldy.
Aýyl sharýashylyǵy mınıstrligi Strategııa departamenti dırektorynyń orynbasary Araılym Álimbekovanyń aıtýyna qaraǵanda, bıyl agrarshylarǵa jeńildetilgen nesıe esebinde 700 mlrd teńge qarajat bólingen. Jeńildetilgen lızıngke 250 mlrd teńge qarastyrylǵan. Bıyl eldegi aýyl sharýashylyǵy daqyldaryn jınaý aýmaǵy – 23,6 mln gektar. Onyń 16 mln gektary – dándi jáne dándi-burshaqty daqyldar. Eginshilik departamenti basqarmasynyń basshysy Baqyt Ilııasovtyń aıtýynsha, bıylǵy oraq naýqanyna 38 myń kombaın, 138 myń traktor jáne 50 myń oraq qatysady. Ár lıtri 274 teńge bolatyn 402 myń tonna jeńildetilgen dızel otyny bólinipti. Bul naryqtyq baǵadan 20%-ǵa arzan. О́tken jyldan bastap jeńildetilgen tehnıka lızıngi baǵdarlamasy iske qosyldy. Ázirge 250 mlrd teńgeniń jartysy ıgerilgen.
Aqmola oblysy
