Sýret: olympic.kz
Buryndary «Federasııa kýbogi» dep atalyp, keıinnen áıgili tennısshi, belgili sport fýnksıoneri ári qoǵam qaıratkeri Bıllı Djın Kıngtiń esimin ıelengen bul týrnır 1963 jyldan beri uıymdastyrylyp keledi. Sol aralyqta eń kóp tabysqa jetken dáp osy AQSh quramasy. Amerıkalyqtardyń 18 jarysta juldyzy jarqyrady. Sondaı-aq bas júldeni oljalaǵandar qatarynda Chehııa (11 ret), Aýstralııa (7), Ispanııa (5), Reseı (5), Italııa (5), Fransııa (3), Germanııa (2), Belgııa (1), Kanada (1), Slovakııa (1), Shveısarııa (1), OAR (1) syndy komanda bar.
Qazaqstan quramasy bolsa, buǵan deıin Bıllı Djın kýboginiń fınaldyq bóliginde bar-joǵy eki ret qana oınaǵan. Bul kúnderi bizdiń eldiń eń úzdik tennısshisi Elena Rybakına WTA reıtınginde 11-oryndy ıelengen. Elimizdiń ekinshi raketkasy Iýlııa Pýtınseva 44-satyǵa jaıǵasty. Basqa qyzdardyń nátıjesi tipten tómen. Desek te juptyq saıystarda Anna Danılınanyń tabysty óner kórsetip júrgenin esten shyǵarmaıyq.
AQSh-qa qarsy shırek fınaldyq saıysqa komanda kapıtany Iýrıı Shýkın Elena Rybakına, Iýlııa Pýtınseva, Zarına Dıas, Anna Danılına jáne Jibek Qulambaevany shyǵarýdy jón kórdi. Al qarsylas komandasynyń namysyn Djessıka Pegýla, Medıson Kız, Emma Navarro, Heılı Baptıst, Teılor Taýnsend qorǵaıdy. Bul quramanyń kapıtany – «Úlken dýlyǵa» sanatyndaǵy týrnırlerdiń alty dúrkin jeńimpazy, Olımpıada chempıony Lındsı Devenport.
Byltyrǵy Bıllı Djın Kıng kýboginiń fınalynda Italııa men Slovakııa quramalary kúsh synasqan. Apennın túbeginiń ókilderi pleı-off dodalarynda Japonııa (2:1) men Polshany (2:1) utty. Slovaktar AQSh (2:1), Aýstralııa (2:0) men Ulybrıtanııaǵa (2:1) san soqtyrdy. Bas júlde úshin tartysta Italııanyń mysy basym boldy. Olar Slovakııany 2:0 esebimen jeńip, bas júldeni oljalady. Jeńimpaz komandanyń sapynda Jasmın Paolını, Lıýchııa Bronsettı, Sara Erranı, Elızabetta Kochcharetto syndy arýlar óner kórsetti.
Qyrkúıek aıynyń ekinshi jartysynda Qytaıdyń Shenchjen qalasynda ótetin pleı-off básekelerinde AQSh pen Qazaqstannan bólek, Italııa men Qytaı, Ispanııa men Ýkraına, Ulybrıtanııa men Japonııa quramalary sheberlik baıqasady.
