Dýnaı ózeniniń jaǵalaýynda elmizdiń ánuranyn Ernur Batyrǵalı shyrqatty. 60 kg salmaq dárejesinde beldesken Túrkistan oblysynyń týmasy bastapqy básekelerde Moldova, Polsha, Belarýs ókilderinen basym tústi. Shırek fınalda ázerbaıjandyq Zeıd Alasqarovtan aılasyn asyrsa, jartylaı fınalda ózbekstandyq Dilshod Kárimovtiń aıaǵyn kókten keltirdi. Fınalda onyń joly tájikstandyq Loık Kýdbýdınovpen qıysty. Bul básekede de qazaq jigitiniń mysy basym boldy. Osylaısha, alty qarsylasyn qapy qaldyrǵan Ernur álem chempıony atandy.
Dál sondaı mártebeli ataqqa qol jetkizýge 66 kg salmaqtaǵy Muhammedálı Jylqaıdardyń da jaqsy múmkindigi boldy. Ol Brazılııa, Bolgarııa, Kanadanyń balýandaryn jolda qaldyryp, jartylaı fınalda reseılik Músilim Kotıevtiń silikpesin shyǵardy. Biraq sheshýshi tusta Reseıdiń taǵy bir ókili Rahım Hamhoevtyń osal tusyn taba almady. Dál osy salmaqta kúresken Rolan Qaıyrǵalı qolaǵa qol jetkizdi. Jartylaı fınalda onyń da jolyn Rahım Hamhoev qıdy. Úshinshi oryn úshin tartysta qandasymyzdyń kanadalyq Anes Matısten mereıi ústem boldy.
50 kg salmaqtaǵy Arman Mysa qola medaldy ıelendi. Sheshýshi saıysta ol majarstandyq Mılan Saboǵa san soqtyrdy. +90 kg salmaqta kúsh synasqan Ádiljan Jaýdınov ta dál mejeden kórindi. Úshinshi oryn jolyndaǵy beldesýde qazaq balýany chehııalyq Melıchar Shkodaǵa shań qaptyrdy.
Erler arasyndaǵy jarystyń qorytyndysynda О́zbekstan quramasy barlyq qarsylasynan qara úzip, jalpy esepte kósh bastady. Olardyń úsh óreni jeńis tuǵyrynyń eń bıik satysyna kóterildi. Reseıdiń eki dzıýdoshysy dál sondaı qurmetke bólendi. Qalǵan úsh altyn Qazaqstan, Grýzııa, Serbııanyń saıypqyrandaryna buıyrdy.
Qyzdar saıysynda О́zbekstan, Reseı, Brazılııa quramalary eki retten bas júldeni ıelense, Japonııa men Mońǵolııanyń burymdylary bir-bir retten top jardy. О́kinishke qaraı, qazaq qyzdarynyń barlyǵy da alǵashqy aınalymdardan asa almady.
