Sýretti túsirgen – Álı ǴALYM
«Amanat» partııasy Jambyl oblystyq fılıalynyń uıytqy bolýymen Taraz qalasyndaǵy «Qazfosfat» mıneraldy tyńaıtqyshtar zaýytynyń óndiris alańynda «Jumysshy jastar amanaty» taqyrybynda forým ótkizildi. Buǵan deıin «Amanat» partııasy jumysshy jastardyń áleýmettik máselesin sheshý, olardyń kadrlyq áleýetin damytý maqsatynda Úkimetpen birge «Jumysshy jastar amanaty» jobasyn qolǵa alǵan bolatyn. Bul forým osy jobany júıeli júzege asyrýdyń naqty kórinisi deýge tolyq negiz bar.
Is-shara barysynda sóz sóılegen Májilis depýtaty, «Amanat» partııasy fraksııasynyń múshesi Muqash Eskendirov óz isiniń naǵyz mamany atanýdyń mán-mańyzyna toqtalyp, jastar qaýymyn el ıgiligi jolynda eńbek etýge shaqyrdy.
«Elimizde jyl saıyn aýqymdy joba júzege asyrylyp jatyr. Onyń birqatary osy Jambyl oblysynda qolǵa alynǵany málim. Bul jobalardy júıeli túrde júzege asyrý úshin, árıne, jumysshy jastar qajet. Elimizdiń bolashaǵy jumysshy mamandyq ıelerimen tikeleı baılanysty. Qazirdiń ózinde qoǵamda óndiris salasynyń mamandary erekshe baǵalanady. Al osyndaı is-sharalar arqyly belsendi jastardy qoldaý isine jarqyn jol ashylyp otyr. Sebebi ómirde barlyq jetistik tek adal eńbekpen, qajyrly qyzmetpen keledi», dedi M.Eskendirov.
«Jastar rýhy» jastar qanatynyń tóraǵasy Aqerke Iskanderovanyń aıtýynsha, uıym jastardy qoldaý maqsatynda aýqymdy jumys atqarǵan. Máselen, «Jastarǵa jumys» jobasy aıasynda elimizdiń barlyq óńirinde bos jumys oryndary jármeńkesi turaqty ótkiziledi. Taıaýda Astanada uıymdastyrylǵan jármeńkege úsh myńǵa jeteǵabyl adam qatysyp, jetpisten astam kásiporyn 2000-nan astam bos jumys ornyn usynypty.
Jastar forýmynda sóz alǵan óńir basshysynyń orynbasary Qanatbek Mádibek oblys aýmaǵynda jumysshy jastardy qoldaý maqsatynda aýqymdy jumys atqarylyp jatqanyn tilge tıek etti.
«Jambyl oblysyna ınvestısııa tartý baǵytynda josparly jumys júrgizilip jatyr. Aldaǵy ýaqytta óńirde 62 ınvestısııalyq jobany qolǵa alý kózdelip otyr. Bul jobalar júzege asqan kezde 6 myńǵa jýyq jumys orny ashylady. Joǵary oqý oryndary men kolledj túlekterin jyl saıyn jumysqa ornalastyrýǵa múmkindik týady. Osy oraıda óńirdegi joǵary oqý oryndarynda kadr daıarlaý jumysy qolǵa alynyp jatqanyn aıta ketken jón. Bizdiń basty mindetimiz – kásibı mamandardyń jańa býynyn tárbıeleý, olardyń boıyna adaldyq, jaýapkershilik syndy asyl qasıetterdi sińirý», dedi ol.
Resmı derekke sensek, Jambyl oblysynda 355 myńnan astam jas bar. Bul kórsetkish óńir turǵyndarynyń 29,1%-yn qurap otyr. Olardyń 41,8%-y qalada, 58,2%-y aýylda turaqtaǵan. Osy kórsetkishke qarap-aq eldi mekenderde jumys isteýge qabiletti jastar jetkilikti ekenin baǵamdaýǵa bolady.
«Bizdiń kásiporynda júzdegen maman eńbek etedi. Solardyń qatarynda eńbek jolymdy slesar retinde bastap, keıin qazandyq operatory, kompressorlyq, tońazytqysh qondyrǵylary aýmaǵynyń sheberi, qazandyq aýmaǵynyń sheberi bolyp jumys istedim. Qazir energetıka resýrstarymen qamtamasyz etý sehy bastyǵynyń orynbasary qyzmetin abyroımen atqaryp júrmin. Osyndaı iri óndiris ornynda eńbek etý – jas mamandar úshin zor mártebe. Kompanııa bizge barynsha qolaıly jaǵdaı jasap jatyr. Munda kásiptik mashyǵymyzdy jetildirýge qajet barlyq múmkindik bar. Ujymymyzǵa bilikti, adal jumysshy jastar qashanda qajet», deıdi «Talas investment company» JSSh qyzmetkeri, jas maman Beksultan Bolǵanbek.
Resmı derekke júginsek, «Qazfosfat» JShS-ǵa qarasty «Mıneraldy tyńaıtqyshtar» zaýytynda 35 jasqa tolmaǵan 1128 jas maman eńbek etedi eken. Olardyń óndiris oshaǵynda júıeli jumys isteýine kásiporyn tarapynan barlyq jaǵdaı qarastyrylǵan.
TARAZ
