Infografıkany jasaǵan – Amangeldi Qııas, «EQ»
Prezıdent atap ótkendeı, jappaı sıfrlandyrý men jasandy ıntellekt tehnologııasyn engizý – ýaqyt talaby. Qazirgi zamanda ınnovasııany ıgergen memleket qana jahandyq básekede óz ornyn saqtap qala alady. Osy turǵydan alǵanda, «Alatau City» sııaqty iri jobanyń iske asyrylýy – tek ekonomıkalyq emes, sondaı-aq ǵylymı-ınnovasııalyq serpilistiń de aıqyn belgisi.
Sonymen qatar ınvestısııalyq saıasatty arttyrý, agroónerkásiptiń áleýetin tolyq paıdalaný, kólik-logıstıka júıesin jetildirý, sý ınfraqurylymyn jańǵyrtý – el ekonomıkasyn ártaraptandyrýǵa baǵyttalǵan naqty qadamdar. Al elimizdiń halyqaralyq yntymaqtastyqty damytý – Qazaqstandy álemdik órkenıettiń aldyńǵy qataryna shyǵarýǵa, basqa eldermen beıbitshilik pen kelisimdi nyǵaıtýǵa jol ashady.
Joldaýda erekshe oryn alǵan taǵy bir mańyzdy másele – parlamenttik reforma. Egemendik alǵan alǵashqy jyldardan bastap elimizdiń saıası júıesi zaman aǵymyna saı jetildirilip keledi. Ýaqyt óte kele qoǵamnyń suranysyna, azamattardyń talap-tilegine sáıkes birqatar saıası reforma kezeń-kezeńimen júzege asyryldy. Bul ózgeristerdiń túpki maqsaty – halyqtyń bılikke degen senimin nyǵaıtý, memleket pen qoǵam arasyndaǵy baılanysty odan ári kúsheıtý. Sondyqtan bul sheshim – el bolashaǵy úshin jasalǵan batyl qadam, memleket pen azamattyq qoǵamdy jaqyndatatyn senimdi kópir.
Memleket basshysy osyndaı taǵdyrsheshti máseleler boıynsha jalpyulttyq referendým ótkizý qajettigin aıtyp saıası reformalarymyz biryńǵaı ınstıtýsıonaldyq júıeniń ajyramas bóligine aınalatynyn taǵy da kórsetti. Ázirge Senat jalpyulttyq referendýmnyń qorytyndysy shyǵarylǵanǵa deıin, jańa parlamenttik saılaý ótkizilgenshe óz jumysyn ádettegideı jalǵastyrady. Bizdiń negizgi mindetimiz – Memleket basshysy belgilegen barlyq bastamaǵa jan-jaqty qoldaý kórsetý. Osy turǵyda tıisti zańdar ýaqtyly ázirlenip, qabyldanýy kerek. Bolashaqta biz múddeli memlekettik organdarmen birlesip osy baǵyttarda jumys isteımiz.
Amangeldi NUǴMANOV,
Senat depýtaty
