Astana Music Hall sahnasynda ótken saltanatty keshke shyǵarmashylyq ındýstrııa men aqparat quraldarynyń ókilderi, mádenıet janashyrlary jınaldy. Olardyń barlyǵy bir arnaǵa toǵysyp, qazaq kınosynyń jańa tynysyn ashqan sáttiń kýási boldy. Unico Play – jaı ǵana sıfrlyq platforma emes, ol ulttyq ónerdiń bolashaǵyn aıqyndaıtyn bastama, sandyq oıyn-saýyqtyń jańa standarty retinde usynyldy. Onyń ataýy da mándi: Unique Content, ıaǵnı «qaıtalanbas mazmun».
Platformanyń basty maqsatyna toqtalǵan Uni-Q Group bas prodıýseri Anar Júnisova ulttyq mazmundy álemge tanytýǵa basymdyq beriletinin jetkizdi.
«Biz Unico Play onlaın kınoteatryn jaı ǵana shyǵaryp jatqan joqpyz. Biz qazaqstandyq fılmderdi kórip, maqtan tutýdy ádetke aınaldyryp jatyrmyz. Biz úshin mıllıondaǵan adamdardyń óz tilinde tarıhty tanýy, al sheteldegi kórermenderdiń bizdiń mádenıetimiz týraly bilýi mańyzdy», dedi bas prodıýser.
Jańa servıs alǵashqy kúnnen-aq qoljetimdiligimen erekshelendi. Smartfonnan bastap Smart TV-ge deıin kez kelgen qurylǵydan kórýge bolady. Alǵashqy aıda jazylym tegin, keıin aıyna nebári 999 teńge turady. Osy qarapaıym qoljetimdiliktiń arqasynda kórermen 10 myń saǵattan astam mazmunǵa jol ashady.
Jobanyń óndiristik áleýetin aıqyndaǵan Uni-Q Group prodıýseri Dmıtrıı Gýdýmak bul platformany «shyǵarmashylyq lıft» dep atady.
«Bul jobany júzege asyrýda biz aımaqtyq jáne jahandyq deńgeıde kontentti óndirý jáne taratý boıynsha barlyq tájirıbemizdi paıdalandyq. Bizdiń maqsatymyz – tolyqqandy óndiris tizbegin qurý – jas ssenarıster pıtchıńinen jáne ózimizdiń túpnusqa serıaldarymyz ben fılmderimizdi túsirýden bastap kontentti monetızasııalaýǵa jáne barlyq naryqtarda avtorlyq quqyqtardy qorǵaýǵa deıin. Bul jas qazaqstandyqtar úshin «shyǵarmashylyq lıft». Olardyń áleýeti orasan zor, tek ony damytýymyz kerek», Dmıtrıı Gýdýmak.
Unico Play tehnıkalyq turǵyda da zamanaýı úlgige saı. Qazaq, orys, aǵylshyn tilderindegi ınterfeıs, 4K sapasy, oflaın rejım, bes qurylǵyǵa deıin bir jazylymnan qoldaný múmkindigi jáne jasandy ıntellektke negizdelgen jeke usynystar otandyq ónimdi álemdik deńgeıdegi servıstermen teńestirip tur.
Al Unico Play basshysy Dııas Dosmuhanbetov platformanyń tehnıkalyq jetistikterin erekshe atap ótti.
«Biz IT sheshimderi bizge syrttan keledi dep oılaýǵa úırengenbiz. Biraq Unico Play kerisinshe dáleldedi. Qazaqstanda sapa men múmkindikteri jaǵynan jahandyq oıynshylarmen básekelesetin platforma qurýǵa bolady. Biz ony ázirleý tobymyzdyń kúshimen bir jylǵa jetpeı oryndadyq», dedi ol.
Platformada bıyldyń ózinde alty túpnusqa serıal kórsetilmek. Taǵy 23 joba óndiriste tur. Kitaphana qorynda qazaq tilindegi álemdik premeralar, tanymal túrik jáne káris serıaldary, otandyq kıno klassıkasy, júzden astam telearna, sporttyq habarlar men qazaq tilindegi balalarǵa arnalǵan eń úlken toptama bar.
Jobanyń alǵashqy ınvestorlarynyń biri, kásipker Tımýr Týrlov bul bastamaǵa qatysty óz kózqarasyn bildirdi.
«Meniń oıymsha, bul mańyzdy ári qajet joba. Múmkindikterdi toqyratyp qoımaı, olardy damytyp, jastardy oqytýǵa baǵyttaıtyn barlyq kemel ári derbes bastamalar qoldaý men járdemge laıyq dep senemin. Qazaq jeri Netflix pen HBO deńgeıinde jarqyraýǵa laıyq talanttarǵa toly. Biz olardyń tabysqa jetýi úshin bar kúshimizdi salamyz», dedi ol.
Sonymen qatar, platformany damytýǵa «Dara» Prezıdenttik bastamalar qory men ózge de jeke ınvestorlar belsendi qoldaý kórsetip otyr. Bul ulttyq jobanyń memleket, qoǵam jáne bıznes tarapynan úlken senimge ıe bolǵanynyń aıǵaǵy.
Premeradan keıingi áserimen bólisken akter ári ánshi Aqjol Pirimbetov Unico Play-diń qazaq kınosy úshin tarıhı bastama ekenin aıtty.
«Búgin Unico Play platformasynyń ashylýy boldy. Platformanyń ashylǵanyna men shyn júrekten óte qatty qýanyshtymyn. Osy prodakshnnyń bir fılmine túskenime de qýanyshtymyn. О́ıtkeni biz qazaq kınosyna úlken úles qosyp jatyrmyz. Qazaq kınosyn búkil álem kórip jatsa – bul naǵyz jeńis. Bizge de jaqsy, ózge elderdiń kınolaryna túsip, tájirıbe jınaımyz. Tipti Oskar alýǵa kishkentaı bir qadamdar qalǵan sııaqty. Sol sebepten bizdiń platformany júktep, kınolarymyzdy kórip qoldańyzdar», dedi ol.
