Sýret: aikyn.kz
Dinı turaqtylyq – qoǵamdaǵy ártúrli dinı senim ókilderiniń ózara syılastyqta, beıbit ómir súrýi, dinı negizdegi qaqtyǵystardyń, alaýyzdyq pen arazdyqtyń bolmaýy. Bul uǵym dinaralyq kelisimdi, dinı saýattylyqty jáne memleket pen din arasyndaǵy tepe-teńdikti bildiredi. Qoǵamda birlik pen kelisim ornasa, el ishinde bólinýshilik pen kıkiljiń bolmaıdy. Dinı alaýyzdyq – kez kelgen memlekettiń tutastyǵyna tónetin úlken qaýip. Sondyqtan dinı turaqtylyq – eldiń birtutastyǵyn saqtaýdyń mańyzdy faktory. Qoǵam tynyshtyǵy – damýdyń alǵysharty. El ishinde beıbit ómir men kelisim bolsa, ekonomıka ósip, bilim men mádenıet damıdy. Ishki turaqtylyq – sheteldik ınvestısııa men halyqaralyq senimniń negizi. Jastardy teris aǵymdardan qorǵaý úshin radıkaldy uıymdar qyzmetiniń aldyn alý mańyzdy. Dinı saýattylyq pen durys tárbıe jastardy jat aǵymdarǵa ketýden qorǵaıdy.
Áleýmettik ádilettilik pen toleranttylyq – basty ustanymymyz. Túrli din ókilderiniń teń quqyqta ómir súrýi qoǵamda ádiletti nyǵaıtyp, ózara syılastyqty arttyrady. Bul – kópetnosty elder úshin úlken jetistik. Bul turǵyda elimiz álemge dinı kelisim men beıbitshilik úlgisin kórsetip otyr. Túrli din men ult ókilderi ózara tatýlyqta ómir súrip keledi. Bunyń bir jarqyn dáleli – Álemdik jáne dástúrli dinder kóshbasshylarynyń sezi elimizdiń beıbitsúıgish saıasatyn áıgiledi. Bul forým alǵash ret 2003 jyly Astana qalasynda uıymdastyrylyp, sodan beri ár úsh jyl saıyn turaqty túrde ótip keledi. Osyndaı jahandyq deńgeıdegi dinı jáne rýhanı kóshbasshylardyń basyn qosý elimizdiń yntymaqshyl, kelisim ornatýshy memleket ekenin kórsetedi. Ári halyqaralyq arenadaǵy bedelimizdi arttyrady.
Sezdiń ótýi qazaq qoǵamynda dinı jáne etnostyq kelisimniń qalyptasqanyn dáleldeıdi. Memleket turǵyndary túrli dindi ustanǵanymen, beıbit qatynas pen birlikte ómir súrip jatyr. Bul qoǵam ishindegi rýhanı turaqtylyqtyń nyǵaıýyna, urpaq tárbıesine jáne ulttyq birlikti saqtaýǵa oń yqpal etedi. Kún tártibinde jıi kóteriletin máseleniń biri – dinı ekstremızm men radıkalızmge qarsy kúres. Álemdik din kóshbasshylary bul taqyrypta óz úndeýlerin jarııalap, adamzatty beıbit ómirge, tózimdilikke shaqyrady. Bul elimizge ǵana emes, búkil álemge tynyshtyq pen qaýipsizdikti nyǵaıtýdyń jolyn usynady.
Osyndaı úlken is-shara barysynda shetelden kelgen kóptegen delegasııa, BAQ ókilderi men qonaqtar eldiń mádenıetin, tarıhyn, dinı tatýlyǵyn kóredi. Bul Qazaq eliniń týrıstik tartymdylyǵyn arttyryp, álemge ashyq el ekenin dáleldeıdi. Dinı qaýymdar arasyndaǵy ózara túsinistik pen syılastyqty nyǵaıtýǵa úles qosady. Dinder arasyndaǵy ortaq qundylyqtardy alǵa shyǵarý arqyly adamdar arasynda tózimdilik pen dıalog mádenıeti qalyptasady. Bul búgingi jahandyq saıası jaǵdaıǵa baılanysty asa qajet qasıettiń biri. Ulttyq múddege de, álemdik qaýipsizdikke de qyzmet etetin mańyzdy tarıhı bastama.
Rústem SABYRJANULY,
Atyraý oblysy Din isteri basqarmasynyń basshysy
