Saltanatty sharaǵa qatysqan Týrızm jáne sport mınıstri E.Myrzabosynov, esek esý sporty túrleri boıynsha «Qaıyq» federasııasy AQB prezıdenti A.Merǵalıev, baıdarka men kanoe esý halyqaralyq federasııasynyń prezıdenti T.Konıesko sóz alyp, óńir turǵyndaryna izgi tilegin jetkizdi.
– Búgin biz úshin tarıhı jáne qýanyshty kún. Elimizde alǵash ret halyqaralyq standartqa saı keletin «Eskek esý» kanalyn ashqaly turmyz. Túrkistanymyz túrki álemin tańǵaldyratyn taǵy da bir zamanaýı nysanmen tolyqqaly tur. Bul - Memleket basshysynyń tikeleı tapsyrmasyna sáıkes, tarıhı Túrkistandy damytý baǵytyndaǵy júrgizilip jatqan naqty jumystardyń jemisi. «Eskek esý» kanalynyń ereksheliginiń biri – qalanyń ekojúıesine de tikeleı áserin tıgizedi. Keshende Azııalyq jáne álemdik deńgeıdegi jarystardy uıymdastyrýǵa bolady. Sheteldik sportshylarǵa jyl on eki aı oqý-jattyǵý jıyndaryn ótkizýge tolyq múmkindik bar. Bul sport kesheni – Túrkistannyń ǵana emes, tutas qazaq eliniń abyroıyn kóteredi. «Eskek esý» kanalyny óńir sportynyń damýyna serpin berip qana qoımaı, Túrkistannyń týrıstik áleýetin arttyrýǵa da zor úles qosady,– dedi Túrkistan oblysynyń ákimi Nuralhan Kósherov jańa nysannyń ashylýymen quttyqtaýynda.
Saltanatty shara aıasynda Halyqaralyq baıdarka jáne kanoe esý federasııasynyń prezıdenti Tomas Konıesko men Qazaqstan «Qaıyq» federasııasynyń prezıdenti Aslanbek Merǵalıev arasynda tarıhı memorandýmǵa qol qoıyldy. Bul qujat Túrkistandy Ortalyq Azııadaǵy esý sporty habyna aınaldyrýǵa jol ashady. «Eskek esý» kanalynda 500-ge jýyq sportshy baıdarka men kanoeda esý, akademııalyq esý, trıatlon, parakanoe, ashyq sýda júzý sııaqty sport túrlerimen turaqty túrde jattyǵa alady.
Aıta ketelik, oblystyń eskek esýshileri el abyroıyn kóterýde. Osy ýaqytqa deıin Qazaqstan Respýblıkasynyń chempıonattary men kýboktarynda 1 800-den astam medal ıelense (406 altyn, 730 kúmis, 676 qola), Álem jáne Azııa chempıonattarynda 184 medal qanjylady (58 altyn, 84 kúmis, 42 qola). Olımpıada oıyndaryna 9 lısenzııa alyndy. О́ńirde bıyl 102 sport nysany paıdalanýǵa tapsyryldy. Kelesi jyly 10 sport ǵımaratyn tapsyrý josparlanyp otyr.
