Qarjy jáne sıfrlyq aktıvter
Jańa «Bankter týraly» Zań naryqqa jańa qatysýshylardy tartýdy jáne bankterdiń ótimdiligin naqty sektorǵa baǵyttaýdy kózdeıdi. Sondaı-aq, joǵary tehnologııalyq salalarǵa Ulttyq qordan 1 mlrd AQSh dollaryna deıin ınvestısııa bólinedi. Almaty mańynda qurylatyn Alatau City arnaıy mártebege ıe qarjylyq-ınnovasııalyq ortalyqqa aınalmaq. Onda krıpto-fıat arnalar engizilip, sıfrlyq aktıvterdiń tolyqqandy ekojúıesin damytý úshin Memlekettik sıfrlyq aktıvter qory qurylady.
О́nerkásip jáne resýrstar
Inflıasııany tejeý úshin retteý sharalary qaıta qaralyp, óndiristik baza nyǵaıtylady. Sırek metaldardy óńdeý, kómirsýtekti tereń óńdeý jobalary iske qosylady. Geologııalyq derekterdi tolyq sıfrlandyrý 2026 jylǵa deıin aıaqtalmaq.
«Geologııalyq derekterdi sıfrlandyrý jumysy jalǵasady. Qazirgi ýaqytta onyń 60%-y sıfrlandyrylǵan. Jumysty tolyq aıaqtaý 2026 jyldyń sońyna qaraı josparlandy. Sonymen qatar geologııalyq derekterdi tolyq qamtý úshin jasandy ıntellektti qoldaný arqyly Big Data aqparattyq júıesin qurý jumysy bastaldy», dedi Úkimet basshysynyń orynbasary.
Agroónerkásip
Aýyl sharýashylyǵynda úsh jyl ishinde 1,2 trln teńgege 200-den astam joba qarjylandyrylady. Mal sharýashylyǵyn damytý jospary jeńil nesıe berý men «Damý» qorynyń 80%-ǵa deıin kepildik júıesin qamtıdy. Jer resýrstarynyń biryńǵaı sıfrlyq kartasy jasalyp, jer bólý konkýrstary tolyq elektrondy formatqa kóshedi.
«Osy jyldyń sońyna deıin Mal sharýashylyǵyndaǵy agrobıznesti damytýdyń keshendi jospary qabyldanady. Onyń sheńberinde 5%-dyq jeńil kredıt berý baǵyty men kredıttik ónimder jelisin keńeıtý josparlanyp otyr», dedi Serik Jumanǵarın.
Infraqurylym jáne logıstıka
«Baqty-Aıagóz» temirjoly men «Sekseýil-Beıneý» avtojoly sııaqty jobalar eldiń kólik áleýetin kúsheıtedi. 2026 jylǵa qaraı Smart Cargo biryńǵaı kedendik júıesi iske qosylyp, ulttyq áýe júk tasymaldaýshy kompanııa qurylmaq. Bul sharalar júk tasymaly kólemin eki esege arttyrýǵa múmkindik beredi.
«2026 jyly Smart Cargo kedendik jáne logıstıkalyq qyzmetter kórsetiletin biryńǵaı sıfrlyq júıesi engizilip, Ulttyq áýe júk tasymaldaýshy kompanııasy iske qosylady. Qabyldanǵan barlyq sharany eskere otyryp, Qazaqstan arqyly júk tasymaldaý kólemi 2 esege ulǵaıady dep kútilýde», dedi vıse-premer.
Týrızm jáne TKSh
Almaty taý klasterin damytý arqyly shańǵy kýrorttarynyń ótkizý qabileti tórt esege artady. TKSh reformasy sıfrlyq sheshimderge jáne energııa tıimdiligin arttyrýǵa negizdeledi. Sonymen qatar, sý saıasaty jańa deńgeıge kóteriledi: 18 sý qoımasy men 14,5 myń km kanal qaıta jańartylyp, 9 jańa sý qoımasy salynady.
«Taý shańǵysy kýrorttarynyń ótkizý qabileti 4 esege artady. Kýrorttyq aımaqtardy keńeıtý men jabdyqtaý boıynsha sharalardy iske asyrý ishki týrızmdi damytýǵa qosymsha serpin beredi. Al Turǵyn úı-kommýnaldyq sharýashylyq (TKSh) júıesin reformalaý sıfrlyq sheshimderdi belsendi engizý, onyń qatarynda energııa tıimdiligin arttyrý arqyly iske asyrylatyn bolady. Iske qosýǵa josparlanǵan Biryńǵaı ulttyq platformasy qurylystyń barlyq kezeńinde jan-jaqty esepke alýdy, josparlaýdy ári monıtorıng júrgizýdi qamtamasyz etýge múmkindik beredi», dedi Úkimet basshysynyń orynbasary.
Kásipkerlik jáne basqarý
Kvazımemlekettik sektor reformalanyp, «Retteýshi ıntellekt ortalyǵy» jasandy ıntellekt arqyly retteýdiń jańa úlgisin qalyptastyrady. Salyqtyq ákimshilendirý de AI-ǵa súıenbek. Al «Memlekettik múlik týraly» Zań memlekettiń ekonomıkadaǵy rólin qaıta anyqtaıdy.
«Strategııalyq josparlaý jáne reformalar agenttiginiń bazasynda jasandy ıntellektini qoldana otyryp, retteýdi jańartýdyń negizgi alańyna aınalatyn «Retteýshi ıntellekt ortalyǵy» qurylady. Salyqtyq ákimshilendirý salyq tóleýshiniń múddesin eskere otyryp, jasandy ıntellekt pen basqa da ozyq tehnologııalar qoldaný arqyly júzege asady. Damý ınstıtýttary óz qyzmetin naqty salalyq mamandanýymen ári ınvestısııalaýǵa arnalǵan mandatymen júzege asyrady», dedi Serik Jumanǵarın.
