Jastar arasynda álem birinshiliginiń kúmis júldegeri Asyljan Esenkeldi 61 kg salmaqta synǵa túsip, alǵashqy aınalymda shveısarııalyq Nıls Leýtert pen aýstralııalyq Georgıı Okorokovty merziminen buryn utty. Sodan keıin onyń joly Tokıo Olımpıadasynyń jeńimpazy, álemniń eki dúrkin chempıony Zaýr Ýgýevpen qıysty. Birinshi kezeńde Esenkeldi Reseıdiń dańqty balýanymen teń dárejede aıqasty. Biraq úzilisten keıin qarqynyn kúrt kúsheıtken Ýgýev qandasymyzǵa bas kótertpedi. Jubanysh beldesýinde Asyljan armenııalyq Manvel Hndzrsıannyń tas-talqanyn shyǵardy.
Úshinshi orynǵa tartys dramaǵa toly boldy. Asyljan AQSh-tyń 18 jastaǵy asa daryndy sheberi, Panamerıka oıyndarynyń jeńimpazy Djaksen Forrestpen ábden arpalysty. Birde Forrest, birde Esenkeldi alǵa shyqty. Básekeniń aıaqtalýyna 3 sekýnd qalǵanda 9:8 esebimen Asyljan alda kele jatty. Sol sátte amerıkalyqqa búıregi burǵan tóreshi balýanymyzǵa eskertý jasap, tarazy basy teńesti. Ereje boıynsha mundaı jaǵdaıda sońǵy upaıdy kim alsa, jeńistiń soǵan beriletini belgili. Bul sheshimmen kelispeıtinin bildirgen ulttyq quramanyń bas bapkeri Madııar Quramysov dereý «chelendj» basty. Istiń aq-qarasyn anyqtaǵan soń, bas qazy kilemdegi tóreshiniń qateligin moıyndap, jeńisti aǵaıyndy Rolan men Erkebulan Keshýbaevtardyń shákirtine berdi. Esep – 10:8. Sóıtip, 23 jastaǵy Asyljan Esenkeldi álem chempıonatynyń qola júldegeri atandy.
70 kg salmaqta kúresken Nurqoja Qaıpanov ózin de, jankúıerlerin de biraz abyrjytty. Alǵashynda jastar arasyndaǵy álem, Panamerıka chempıony, 18 jastaǵy amerıkalyq Peter Dıýkten 0:4 esebimen jeńilip jatqan Nurqoja ekinshi kezeńde jeńisti qarsylasynyń ýysynan julyp áketti – 11:7. Kóp keshikpeı Meksıkanyń saqa sportshysy, san márte óz qurlyǵynyń teńdessizi dep tanylǵan Ostın Gomespen kúsh synasty. Birinshi kezeńnen keıin Qaıpanov 0:6 esebimen utylyp jatty. Ekinshisinde «kambek» jasap, qatarynan 11 upaıdy óz enshisine jazdy, esep – 11:7.
Jartylaı fınalda Nurqojanyń álem chempıonatynyń qola júldegeri, Azııa oıyndarynyń jeńimpazy, mońǵolııalyq Tulǵa Tómór Ochırynge áli jetpedi – 2:5. Qola medal úshin básekede qazaqtyń qaısar uly sheberlik tanytyp, Moldovanyń maqtanyshy Vasıl Dıakondy bozkilemde qamyrsha ıledi. Esep 13:2-ge jetkende tóreshi kezdesýdi toqtatty. Endi Nurqoja Qaıpanovtyń qorjynynda álem chempıonatynyń tolyq júlde jıyntyǵy bar. 27 jastaǵy jerlesimiz 2019 jyly Astanada kúmispen kúptelse, 2024 jyly Tıranada altyn aldy. Endi mine, Zagrebte qola medaldy moınynda jarqyratty.
Jarystyń alǵashqy kúni bozkilemge shyqqan Álisher Erǵalı (125 kg) bolgarııalyq Alen Hýbýlovtyń osal tusyn taba almady. Keıingi eki álem chempıonatynda qolaǵa qol sozǵan Azamat Dáýletbekovtiń de (86 kg) joly bolmady. Bastapqy básekelerde qarsylastaryn aıqyn basymdyqpen utqan balýanymyz shırek fınalda Fransııanyń namysyn qorǵaǵan sheshen jigiti Raqym Magamadovtan jeńildi.
Ekinshi kúni taǵy tórt salmaq dárejesi boıynsha básekeler ótti. Tusaýkeser kezdesýlerinde Ádilet Álmuhamedov (57 kg) belarýstik Araıyn Tıýtrınnen, Aıbek Ábdiqasymov (74 kg) majarstandyq Murat Quramagomedovten, Bolat Saqaev túrkııalyq Ibragım Japyraqtan jeńildi. 92 kg salmaqta synǵa túsken 20 jastaǵy Kámil Krýglıev alǵashqy beldesýlerinde qytaılyq Hýa Ze men ızraıldik Iýrıı Kalashnıkovti jeńdi. Alaıda shırek fınalda ózinen 10 jas úlken Reseıdiń ókili Amanýlla Gadjımagomedovten aılasyn asyra almady. Jubanysh beldesýinde ıtalııalyq Bendjamın Honısti qapy qaldyrdy. Qola medal úshin tartysta Kámildiń joly Azııanyń úsh dúrkin chempıony Ámir Hosseın Fırýzpýrmen qıysty. Bul báseke parsy balýanynyń aıqyn jeńisimen aıaqtaldy.
Erkin kúres sheberleri arasynan eń sońǵy bolyp jarys jolyna shyqqan Nachyn Kýýlar (65 kg) men Rızabek Aıtmuhan da (97 kg) el senimin aqtaı almady. Tyvalyq legıoner alǵashqy eki qarsylasyn ońaı eńsergenimen, reseılik Ibragım Ibragımovke ese jiberdi. Rızabek osy chempıonatta dańqy jer jarǵan Abdýlrashıd Sadýllaevty almastyrǵan daǵystandyq Magomed Qurbanovpen kúsh synasty. Beldesý barysynda tarazy basy uzaq ýaqyt boıy teńselip turdy. Básekeniń aıaqtalýyna sanaýly sekýndtar qalǵanda Aıtmuhan bir upaı aıyrmashylyǵymen alǵa shyqty. Alaıda aıqastyń aıaqtalýyna nebári úsh sekýnd qalǵanda tóreshi bizdiń balýanǵa eskertý berdi. Bapkerler narazylyq bildirip, «chelendj» basty. Biraq odan eshteńe ózgergen joq. Sóıtip, otandyq erkin kúres tarıhyndaǵy tuńǵysh álem chempıony Rızabek Aıtmuhan Horvatııadaǵy chempıonattyń alǵashqy aınalymynan soń kórermender qataryna qosyldy.
Qazirde barsha qazaq jankúıerleri áıelder kúresi men grek-rım kúresi sheberleriniń joldaryna úlken úmitpen qarap otyr. Jarys 21 qyrkúıekte máresine jetedi.
