Sýretti túsirgen – Jumabekov
Bul Laslo Kıoverdiń Qazaqstanǵa jasaǵan úshinshi sapary. Bul jaıt Majarstan tarapynan Qazaqstanmen yntymaqtastyqty tereńdetýge degen erekshe yqylasty kórsetedi. Buǵan deıin Májilis tóraǵasy Erlan Qoshanov Býdapeshtte bolyp, eki el parlamentteri arasyndaǵy yntymaqtastyq týraly kelisimge qol qoıǵan edi. Qazirgi sapar sol kelisimderdiń jalǵasy bolyp otyr.
Erlan Qoshanov óz sózinde Qazaqstan men Majarstan parlamentteri yntymaqtastyqty jańa deńgeıge kóterýge nıetti ekenin aıtty.
«Keıingi jyldar qazaq-majar qarym-qatynasyn jańa deńgeıge kóterýdegi mańyzdy kezeńge aınaldy. Bul qos el kóshbasshylarynyń myzǵymas dostyǵynyń, eren eńbeginiń arqasy dep bilemiz. 2023 jyly Majarstannyń Premer-mınıstri Vıktor Orban Qazaqstanda resmı saparmen boldy. Prezıdentimiz Qasym-Jomart Toqaevtyń byltyrǵy Majarstanǵa memlekettik sapary nátıjeli ótti. Strategııalyq kelisimderge qol qoıylyp, mańyzdy ýaǵdalastyqtar jasaldy. Endi osy kelisimderdi zańnamalyq turǵyda qamtamasyz etý – bizdiń ortaq mindetimiz», dedi Májilis tóraǵasy.
Kezdesý barysynda taraptar parlamentaralyq yntymaqtastyqty arttyrýda dostyq toptarynyń róline jáne zań shyǵarý tájirıbesin bólisýdiń mańyzyna toqtaldy. Erlan Qoshanov parlamentshiler arasyndaǵy dıalogtyń joǵary qarqynyna nazar aýdaryp, Laslo Kıoverdiń sapary eki jaqty qarym-qatynastardy odan ári nyǵaıtýǵa serpin beretinine senim bildirdi.
Sondaı-aq, taraptar halyqaralyq uıymdardaǵy ózara qoldaýdyń mańyzyn atap ótti. Qazaqstan men Majarstan depýtattary Parlamentaralyq Odaq, EQYU, Eýropa Keńesi parlamenttik assambleıalary aıasynda turaqty túrde áriptestik ornatyp keledi. Túrki memleketteri Parlamenttik Assambleıasy sheńberindegi yqpaldastyq ta nátıjeli ekeni aıtyldy.
Erlan Qoshanov majar áriptesterine Qazaqstanda qolǵa alynyp jatqan reformalar týraly keńinen áńgimelep berdi. Ol Memleket basshysy Joldaýynda aıtylǵan bastamalarǵa toqtalyp, parlamenttik reformalardy júzege asyrý úshin qabyldanyp jatqan zańnamalyq sharalardy túsindirdi. Ásirese sıfrlandyrý men jasandy ıntellektini damytý baǵytyndaǵy jańa zań jobalaryna nazar aýdardy.
Aıta keteıik, búgin Májilis Jasandy ıntellekt týraly zańdy ekinshi oqylymda qabyldaıdy. Zańda ony barlyq deńgeıde qoldanýdyń quqyqtyq prınsıpteri men tásilderi aıqyndalǵan. Majarstan osy salada nátıjeli jumys istep jatyr. Qazaqstan bul baǵytta yntymaqtastyqty damytýǵa jáne osyndaı jobalardy iske asyrýda tájirıbe almasýǵa múddeli.
О́z kezeginde, Laslo Kıover qazaq pen majar halyqtarynyń tarıhı tamyrlastyǵyna toqtalyp, parlamentaralyq qarym-qatynastyń elder arasyndaǵy seriktestikti nyǵaıtýdaǵy mańyzdy rólin atap ótti. Ol Qazaqstanda josparlanyp otyrǵan bir palataly parlament modeline qatysty Majarstannyń tájirıbesimen bólisýge daıyn ekenin jetkizdi.
«Qundylyqtarymyz, dástúrlerimiz ben ortaq tarıhymyzdan bólek, bizdi búginimiz ben bolashaǵymyz da baılanystyryp, jaqyndatyp otyr. Siz Qazaqstanda keleshekte bir palataly parlamentke kóshý josparlanyp jatqanyn atap óttińiz. Qajet bolǵan jaǵdaıda biz Majarstannyń osy prosestegi tájirıbesimen bólisýge daıynbyz», dedi Laslo Kıover.
Budan bólek, taraptar saýda-ekonomıka, ınvestısııa, aýyl sharýashylyǵy, kólik-tranzıt, energetıka, mádenı-gýmanıtarlyq salalardaǵy seriktestiktiń keleshegin sóz etti.
Kezdesý sońynda Erlan Qoshanov Memleket basshysynyń atynan Laslo Kıoverge Qazaqstan men Majarstan arasyndaǵy yntymaqtastyqty damytýǵa qosqan eńbegi úshin «Dostyq» ordenin tabys etti.
