Sýretti túsirgen – Salı Sabırov
Alǵashqy júldelerdi jasóspirimder sarapqa saldy. Qyzdar básekesinde Ońtústik Koreıanyń ókili Kım Gonhıdiń baǵy jandy. Onyń komandalyq áriptesi Kım Mın Son kúmis alsa, Ázerbaıjannan kelgen Arına Kalýgına qola medal ıelendi. Jerlesimiz Anna Sannıkova altynshy satyda qalyp qoıdy. Uldar saıysynda barlyq júldeni otandastarymyz oljalady. Artýr Smaǵulov birinshi, Nıkıta Kozlov ekinshi, Kenan Berdibaev úshinshi oryndardy enshiledi.
Áıelder jarysyndaǵy basty úmitimiz Sofııa Samodelkınanyń jaraqatyna baılanysty osy memorıalǵa qatyspaıtyny belgili bolǵanda-aq júldege qol jetkize almaıtynymyzdy aldyn ala boljaǵan edik. Aıtqandaı-aq, qyzdardyń qysqa baǵdarlamadaǵy kórsetkishteri tym nashar boldy. Kelesi kúni de mandytyp syrǵanaı almady. Otandastarymyz mynadaı oryndardy enshiledi: Ámıra Irmatova – 6, Nurııa Súleımen – 7, Sofııa Farafonova – 9, Veronıka Kovalenko – 10, Rýsalına Shakrova – 11-oryn. Burymdylar básekesinde álem chempıonatynyń kúmis júldegeri Lı He In altynnan alqa taqsa, Iýn Ason kúmispen kúpteldi. Bulardyń ekeýi de Ońtústik Koreıadan. Kanadalyq Madlen Skızas qola medaldy moınyna ildi.
Muzdaǵy bıde jerlesterimiz Boısangýr Datıev pen Gaýhar Naýryzova 9-oryndy qanaǵat tutty. Bas júldeni grýzııalyq Dıana Devıs pen Gleb Smolkın jeńip aldy. Ekinshi, úshinshi satylarǵa AQSh, Shvesııanyń juptary jaıǵasty.
Erler saıysynda álem chempıonatynyń kúmis júldegeri Mıhaıl Shaıdorov taǵy da top jardy. Jattyǵýdyń eki túrinde de qarsylas shydatpaǵan 21 jastaǵy jerlesimiz qatarynan ekinshi márte Denıs Ten memorıalynda jeńis toıyn toılady. Grýzııanyń myqtysy Nıka Egadze kúmis júldege ıe bolsa, AQSh sportshysy Djeıson Braýn úzdik úshtikti túıindedi.
