Búginde oblysta 296 mádenı (til jáne arhıv) mekemesi jumys isteıdi. Onda 2 194 qyzmetker eńbek etse, olardyń 1 358-i aýyldyq jerlerde, al 836-sy qalalardaǵy mádenı uıymdarda qyzmet atqarady.
– Bıyl 9 aıda oblys kóleminde ulttyq óner men rýhanııatty dáripteıtin birqatar mańyzdy mádenı is-sharalar ótkizildi. Atap aıtqanda, Qazaqstannyń eńbek sińirgen mádenıet qaıratkeri Adaı Azamatovtyń 70 jyldyq shyǵarmashylyq keshi, aqyn Tólegen Janǵalıevtiń 75 jyldyq mereıtoıy, kompozıtor Oleg Janııarovtyń 80 jyldyǵyna arnalǵan konsert jáne Mádenıet Eshekeev atyndaǵy dástúrli ánshilerdiń respýblıkalyq baıqaýy uıymdastyryldy, – dedi Abzal Saparbekuly.
Sonymen qatar, «Abaı eli – óner kenishi» atty oblystyq kórkemónerpazdar baıqaýyna 10 aýdannan 1 500-ge jýyq ónerpaz qatysyp, úzdikter marapattaldy. Bas júlde Abaı aýdanyna tabystalyp, barlyq qatysýshylarǵa 1 mıllıon teńge mólsherinde qarjylaı syıaqy berildi.
– Abaı Qunanbaıulynyń 180 jyldyq mereıtoıy aıasynda oblys boıynsha 100-ge jýyq mádenı, ǵylymı jáne sporttyq is-shara ótkizildi. 10 tamyzda Qaraýyltóbede ótken basty merekelik jıyndy 50 myńǵa jýyq kórermen tamashalady. Sondaı-aq teatr jáne mýzyka salasy da qarqyndy damýda. Máselen, Abaı atyndaǵy teatr 9 aıda 157 spektakl qoıyp, 39 myńnan astam kórermendi qamtydy. Teatrdyń eki trýppasy halyqaralyq festıvalderde gran-prı ıelendi. Ámire Qashaýbaev atyndaǵy memlekettik fılarmonııa 85 konsert ótkizip, 24 myńǵa jýyq kórermenge rýhanı syı tartty, – deıdi basqarma basshysy.
Abaı oblysy
