Osylaı daıyn bolǵan tordy búrkit meken etken soqpa jerge jaıady. Taýdyń basy emes, oı-jazyq ta emes, orta balaq tusy bolǵany durys. Tor quratyn oryn sál shuńqyrlaý bolsa qolaıly. Shybyq aǵashtaryn jerge aınaldyra qadaıdy. Syrtynan tormen dóńgelete qorshap, jaǵasyndaǵy kenere baýmen shybyqtardyń basyn bir-bir shalyp, kerip baılaıdy. Baýdyń artyq shyqqan ushyn aýyrlaý tasqa nemese qazyqqa baılap, shyjymdap tastaıdy. Tordyń shalǵaılanǵan etegin syrtyna qaraı keńeıtip, irgesin kólbeı alysqa sozyp, usaq tastarmen baılap, bastyryp, aspanǵa qaraǵan sheńberin taryltyp tigedi. Tordyń joǵarǵy aýzy búrilip, etek jaǵy keń kelip turady.
Mundaǵy sebep, túz búrkiti ańdaýsyz kelip torǵa oralǵanda úsh shybyq jyǵylady da, qus eki berik shybyqtyń ortasyna aspaqtalyp, kúsh ala almaı, tabany jerge tımeı salaqtap qalady. Eger tabany jerge tıse, tabanymen basyp turyp, tordy tumsyǵymen qyrqyp, shyǵyp ketedi. Búrkitti qyzyqtyryp torǵa túsirý úshin qoıannyń biteý terisine shóp nyǵap, qoıan sııaqty kep jasap, uzyndyǵy qoıannyń boıymen birdeı, jalpaqtyǵy eki eli keletin juqa taqtaıdyń ortasyn basbarmaq aınalatyndaı tesip, keptiń ishine kirgizip ornalastyrady.
Odan keıin tordyń ishine aspanda ushyp júrgen búrkittiń kózi shalatyndaı jemtik tastap, onyń qasyna quzǵyn, qarǵa, saýysqan sııaqty tiri qustardy baılap qoıady. Tájirıbeli qusbegiler kóbinde quzǵyndy tordyń ishine baılaıdy. Sebebi quzǵyn búrkittiń uıasyna túsip, jumyrtqasyn tesip, sary ýyzyn iship ketetindikten ekeýi bir-birine óte ósh keledi.
Mańynan adam uzap ketken tordyń ishindegi baılaýly qustar jemtikti julqylap jeı bastaǵanda, olardyń qozǵaýymen qoıan kebi tiri sııaqtanyp, shoqyryqtap áreket etedi. Bulardy alystan ańǵarǵan albyrt qyran qarǵa qoıanmen jaǵalasyp júr eken dep oılap, qomaǵaılanyp torǵa qaraı shúıiledi. Tóbesinen tóngen jaýyn kórgende záresi ushqan tordaǵy quzǵyn barqyldap mazasy ketip, jantalasady. Osy kezde kózi tunyp, shúıilip kelgen búrkit eshnárseden tartynyp seskenbeı tordy kıip áketedi. Keıde tordyń syrtynan qaptalyp tússe, keıde tóbesinen tik túsip, quzǵyndy ustap jep, endi ushqanda tik shyǵa almaı torǵa shyrmalyp qalady.
