Tımýr Qulybaevtyń «Halyk» qaıyrymdylyq qorynyń demeýshiligimen, «Qyzylsha jer» kompanııasynyń uıymdastyrýymen ashylǵan zamanaýı sport alańy jergilikti turǵyndar men sportshylardyń bas qosatyn ortalyǵyna aınalmaq. Bul - ulttyq sport túrlerin damytý men aýyldyq ınfraqurylymdy jańǵyrtýǵa baǵyttalǵan mańyzdy qadam.
Jańa nysan 300-den astam kórermenge arnalǵan. Ashylý rásimi aıasynda qazaqtyń ulttyq dástúrlerin dáripteý jáne jas sportshylardy qoldaý maqsatynda aımaqtyq kókpar týrnıri uıymdastyryldy.
Zamanaýı talaptarǵa saı salynǵan trıbýnada kórermenderge arnalǵan yńǵaıly oryndar qarastyrylǵan, sportshylar úshin barlyq jaǵdaı jasalyp, jarystardy joǵary deńgeıde ótkizýge múmkindik beretin ınfraqurylym ornatylǵan.
«Belbasar aýylyndaǵy kókpar týrnıri men jańa stadıonnyń ashylýy ulttyq rýh pen sporttyń toǵysqan aıshyqty sáti. Biz úshin mundaı jobalar tek sport nysanyn salý emes, aýyl jastarynyń damýyna, ulttyq dástúrdiń jańǵyrýyna úles qosý.
«Halyk» qorynyń basty maqsaty – eldiń ár óńirinde áleýmettik ınfraqurylymdy jańǵyrtyp, halyqtyń ómir sapasyn arttyrý. Kókpar sııaqty ulttyq sport túrlerin qoldaý arqyly biz jas urpaqqa otansúıgishtik pen birlik rýhyn sińirýge tyrysamyz», deıdi «Halyk» qorynyń Basqarýshy dırektory Narıman Ábilshaıyqov.
Ashylý rásimine dańqty kókparshy, KSRO chempıony Ábilhan Dáýilbaev, mesenat ári Shý aýdanynyń Qurmetti azamaty Bolat Saýranbaev, sondaı-aq óńir ákimdigi men «Halyk» qorynyń ókilderi qatysty. Qonaqtar jańa sport nysanynyń mańyzyn atap ótip, ulttyq dástúr men sportty damytý jolyndaǵy osyndaı ıgi bastamalarǵa jyly lebizderin bildirdi.
«Búgingi shara ulttyq rýhtyń, birliktiń aıǵaǵy. Osyndaı ıgi isterge uıytqy bolyp júrgen Tımýr Qulybaevtyń «Halyk» qaıyrymdylyq qoryna aýyl atynan alǵysymdy bildiremin. Bul – sportqa ǵana emes, jastardyń namysy men jigerin oıatýǵa baǵyttalǵan úlken qoldaý», dedi dańqty kókparshy, KSRO chempıony Ábilhan Dáýilbaev.
Bap pen baq synasqandar
Belbasardyń kók shalǵynynda óńirdiń myqty segiz ujymy bap pen baǵyn synǵa saldy: Merke quramasy, Belbasardyń «Amanaty», «Birles – Áýlıeata», sondaı‑aq «Tátti», T.Rysqulov, «Aqsý», «Balýan Sholaq» jáne «Shý» komandalary ár shabýylda alaman aıdynyn ot qylyp, kókpardyń kórkin kirgizdi. Bas tóreshi Qýan Quramaev tartystyń taǵdyrly sátterin ádildikpen tarazylap, oıynnyń ár sátine dem berildi.
Mereı tuǵyrynyń bıigine Merke qurama komandasy kóterilip, 3 mıllıon teńgelik bas júldeni enshiledi. Belbasardyń márt namysyn arqalaǵan «Amanat» kúmis júldege laıyq dep tanylyp, 2 mıllıon teńgege ıe boldy. «Birles – Áýlıeata» namysty qoldan bermeı, qola júldeni 1 mıllıon teńgemen túıindedi.
Ulttyq sportty asqaqtatý
Belbasardaǵy bul uly dýman - ulttyq salt-dástúrdi tiriltken, eldiktiń eńsesin kótergen shynaıy rýh merekesi. Osyndaı ıgi iske muryndyq bolǵan Halyk qaıyrymdylyq qory ulttyq sportty jańa sapaǵa kóterip, óńirlik ınfraqurylymdy nyǵaıtýǵa tyń serpin berdi. Halyk qorynyń qamqorlyǵymen ótken bul týrnır qazaq halqynyń mádenı murasyn saqtaýǵa jáne damytýǵa baǵyttalǵan mańyzdy qadam boldy.
