Prezıdenttik jastar kadr rezerviniń úlgisinde jasalǵan joba nátıjesinde 2023-2024 jyldary 583 pedagog rezervıst atandy. Onyń ishinde 397 basshynyń orynbasary, 186 pedagog bar. Qazirgi ýaqytta olardyń 419-y nemese 71%-y laýzymdarǵa taǵaıyndalǵan. 40 dırektor «Keleshek mektepteri» Ulttyq jobasy aıasynda ashylǵan mektepterdi basqaryp otyr.
Al 2025 jyly Pedagogıkalyq sheberlik ortalyǵynda mektep dırektorlarynyń orynbasarlaryn oqytý 21 shildede bastalyp 12 qyrkúıekte aıaqtaldy. Bilim berýdegi ózgeris kóshbasshylary birneshe kezeń boıy iriktelip, úsh deńgeıde biliktiligin arttyrdy. Sonyń ishinde bazalyq deńgeıden bastap, saraptamalyq, kásibı daıyndyq deńgeıine deıin ártúrli baǵdarlamalar qamtylǵan. Bul oqý baǵdarlamalary mektepti tıimdi basqarýǵa qajetti daǵdylardy jetildirýge baǵyttalǵan.
Bolashaq mektep dırektorlaryn oqytýǵa arnaıy daıyndyqtan ótken, sertıfıkattalǵan trenerler tartyldy. Olar mektep basshylaryń biliktiligin arttyrýda 12 jyldan astam tájirıbesi bar, atalǵan baǵdarlama boıynsha Kembrıdj Baǵalaý keńesiniń sertıfıkattaryna ıe mamandar.
Nátıjesinde, 411 kandıdat qorytyndy baǵalaýdan ótip, áńgimelesýge jiberildi. Áńgimelesýdiń qorytyndysy boıynsha usynylǵan 403 kandıdatqa Oqý-aǵartý mınıstri Juldyz Súleımenova sertıfıkattar tabystap, kadrlyq rezervke qabyldady.
Eske sala keteıik, «Bilim berýdegi ózgeristerdiń 1000 kóshbasshysy» jobasyn sátti aıaqtaǵan jáne kadr rezervine kirgen mamandar konkýrstyq rásimderden ótpeı-aq birinshi basshynyń bos ornyna taǵaıyndalady.
