Sýretti túsirgen – Erlan OMAR, «EQ»
Aqerke ISKANDEROVA,
«Jastar rýhy» JQ tóraǵasy:
Ulttyq merekege qyzyǵýshylyq artty
Keıingi jyldary jastar Respýblıka kúnin jeke demalys retinde ǵana emes, óziniń el aldyndaǵy ornyn sezinip, azamattyq belsendiligin kórsetýge múmkindik retinde qabyldaı bastady. Bul rette «Jastar rýhy» jastar qanaty jyl saıyn Respýblıka kúnine oraı keń aýqymdy is-sharalar uıymdastyrady. Bıyl da dástúrden jańylmaı, 3 qala men 17 oblystyq fılıalda bir mezette ótetin mazmundy is-sharalar kesheni daıyndaldy. Sonyń ishinde erekshe atap óterligi – «Meniń elim – meniń týym» atty patrıottyq bastama.
Aksııa – jastardyń boıyndaǵy elge degen súıispenshilikti, maqtanysh sezimin nyǵaıtatyn naqty áreket. Byltyr alǵash ret «Amanat» partııasynyń ortalyq apparatynda elimizdiń eń úlken Týy (24×12m) ilinip, búkil respýblıkaǵa áserli rámiz retinde tanyldy. Bul Tý keıinnen jaýapty fýtbol matchtarynda, halyqaralyq deńgeıdegi konsertterde, onyń ishinde Dımash Qudaıbergenniń óner keshinde jelbirep, rýh pen birliktiń kórinisine aınaldy.
Bıyl alǵash ret respýblıkalyq deńgeıde tarıhı oryndarǵa, mýzeıler men eskertkishterge arnaıy ekskýrsııalar uıymdastyrylyp otyr. Munyń bári urpaqtyń ishki rýhanı ózegin qalyptastyrýdy kózdeıdi. Al ulttyq sana, azamattyq jaýapkershilik, tarıhı jadsyz el bolý múmkin emes. Jastar qanatynyń mindeti – jastardyń sana-sezimin oıatý, oı salý.
Jandos AQTAEV,
«Esbol Qory» qoǵamdyq qorynyń tóraǵasy:
El erteńi – sergek sanada
Respýblıka kúni – jaı ǵana mereke emes, ulttyń taǵdyryna, eldiń erteńine degen jaýapkershilikti eseleı túsetin kún. 35 jyl buryn qabyldanǵan Egemendik deklarasııasy – halqymyzdyń ǵasyrlar boıy ańsaǵan táýelsizdik armanyna jol ashqan tarıhı qadam. Sondyqtan 25 qazan – búgingi jetistikterimizdi baǵalap, eldik muratty keler urpaqqa amanat etý mindetin eske salatyn aıtýly kún.
Búginde memlekettiń bolashaǵy shekaramen, saıası derbestikpen ne zańdyq mártebemen ólshenbeıdi. Qazir álemdegi qaýip-qater sana keńistiginen bastalady. Demek naǵyz egemen el bolý – rýhanı, áleýmettik jáne fızıologııalyq táýelsizdikke jetý, ár azamattyń erkin oılap, erkin ómir súre alýy degen sóz.
El egemendigin qorǵaýdyń jańa formasy – jastardyń sanasyn qorǵaý. Al nashaqorlyq, ınternet arqyly taralatyn búldirgi ıdeologııalar men táýeldi minez-qulyq – ult bolashaǵyna tóngen eń kúrdeli qaýip. «Esbol Qory» osy baǵytta birneshe jyl qatarynan júıeli jumys júrgizip keledi. Biz tek nashaqorlyqtyń aldyn alý emes, jalpy salamatty ómir mádenıetin qalyptastyrýdy maqsat etemiz. Tól jobalarymyzdyń basym bóligi jas býynnyń quqyqtyq, qarjylyq jáne medıa saýatyn arttyrýǵa, óz ómirine jaýapkershilikpen qaraýǵa baǵyttalǵan. Osylaısha, biz sıfrly zamanda ulttyq sanany nyǵaıtyp, memlekettiń rýhanı irgesin bekitemiz.
Nurasyl BEKMATOV,
«Jasyl el» jastar eńbek jasaqtary respýblıkalyq shtabynyń basshysy:
Jaýapkershiliktiń orny bólek
Respýblıka kúni – jastar úshin óz eliniń taǵdyryna beıjaı qaramaýǵa shaqyratyn, el múddesin qorǵaýǵa jiger beretin mereke. Mańyzdy data – ár jasqa: «Men – Qazaqstannyń azamaty retinde elime qandaı úles qosyp júrmin?» degen oı týdyrady. Mine, bul elge, jerge degen súıispenshilikti qalyptastyrady. «Jasyl el» qozǵalysynyń basty mıssııasy da osy – patrıottyq sezimdi naqty iske aınaldyrý, jastardyń áleýetin el ıgiligine baǵyttaý.
2005 jyldan beri qozǵalys el jastaryn tabıǵatty qorǵaý, abattandyrý, kógaldandyrý jumysyna jumyldyryp keledi. Myńdaǵan jas tek tabıǵatty qorǵap qoımaı, otansúıgishtik pen eńbekqorlyqqa tárbıelendi. Bul – eń aldymen eńbekke, ultqa, jerge degen qurmetti úıretetin úlken mektep.
Álisher SADYQ,
Aqtóbe qalalyq jastar resýrstyq ortalyǵynyń basshysy:
Tól qundylyqtardy qasterleımiz
Qazirgi tańda jastar táýelsizdikke arqaý bolǵan merekeni úlken iltıpatpen qabyldaıdy. О́ıtkeni jas býyn elimizdiń egemendigi, jalpy tól qundylyqtarymyzdy ómirsheńdigi úshin belsendi áreket etip júr. Olardyń bilim, ǵylym, mádenıet jáne sport salalaryndaǵy jetistikterin jıi kóremin. Shetelde júrse de, týǵan eliniń atyn asqaqtatyp júrgen jastarymyzdyń tabysy – bárimiz úshin zor maqtanysh. Bul – táýelsiz eldiń jańa býynynyń qandaı deńgeıge kóterilgeniniń aıǵaǵy.
Buryn ulttyq kıim tek Naýryz merekesinde kıilse, qazir qoǵamnyń kózqarasy ózgerdi. Ol kúndelikti obrazǵa aınaldy. Bul rette jastardyń úlesi basym. О́zim on jyl boıy «Júrekten júrekke» eriktiler tobynda qyzmet ettim. Bul – taza qoǵamdyq baǵyttaǵy jumys. Sol aralyqta túrli qaıyrymdylyq aksııalary, sporttyq týrnırler men mádenı is-sharalar uıymdastyryp, qarjy jınap, qıyn jaǵdaıdaǵy otbasylarǵa azyq-túlik, kıim-keshek, dári-dármek jetkizdik, keıbirine baspana alýǵa da járdemdestik. Osyndaı ister arqyly talaı adamnyń ómirine úmit syıladyq.
Qazirgi jastardyń basty ereksheligi de sol – olar belsendi ómirlik ustanymdy qoldaıdy, qoǵamǵa paıdaly bolýdy kóbirek oılaıdy. Menińshe, merekelerdiń básin bıiktete túsetin de – osy dúnıeler.
Aqnur TURDALIEVA,
«Jas ulan» biryńǵaı balalar men jasóspirimder uıymy» respýblıkalyq qoǵamdyq birlestiginiń basshysy:
Tárbıe – talbesikten
Egemendik deklarasııasy – ulttyń óz taǵdyryn ózi sheshýge, óz bolashaǵyn ózi qurýǵa berilgen múmkindik. Al búgingi bolashaqtyń ıesi – jas urpaq. Sondyqtan táýelsiz eldiń irgetasy urpaq tárbıesinen bastaý alýy zańdylyq. Osy turǵyda elimizdegi eń iri balalar men jasóspirimder qozǵalysy – «Jas ulan» biryńǵaı balalar men jasóspirimder uıymynyń jumysy egemendiktiń mánin tereń uǵyndyrýǵa jáne ulttyq sanany qalyptastyrýǵa baǵyttalyp keledi.
Bizdiń uıym 2011 jyldan bastap ár óńirdegi myńdaǵan mektep oqýshylaryn biriktirip, eljandylyqqa, eńbeksúıgishtikke, jaýapkershilikke baýlyp keledi. Búginde uıymnyń qatarynda
3 mıllıonnan asa jasulandyq bar.
Búgingi jas ulan – erteńgi el tiregi. Biz táýelsiz eldiń erteńin senimdi qolda qaldyrý úshin eńbek etemiz. Balalardyń boıyndaǵy erik-jiger, izdenis pen shyǵarmashylyqty damyta otyryp, adal oıly, ádil minezdi, meıirimdi de jaýapkershiligi basym urpaq tárbıeleımiz.
Daıyndaǵan –
Zeıin ERǴALI,
«Egemen Qazaqstan»
