Mádenı shara Qazaqstan Respýblıkasynyń Elshiligimen Taras Shevchenko atyndaǵy Kıevtik ortalyq saıabaǵy aýmaǵyndaǵy qazaq kıiz úıinde Ýkraına Joǵarǵy Radasy depýtattarynyń, Jambyl Jabaev atyndaǵy Kıevtik qoǵamdyq kitaphanasynyń, «Analar úıi» basshylyǵynyń jáne birqatar erikti balalar uıymdarynyń, sondaı-aq qazaq dıasporasy ókilderiniń, jas oqyrmandar men ata-analarynyń qatysýymen uıymdastyryldy.
Aıtýly oqıǵa barysynda anımatorlardyń kórsetilimderi, baıqaýlar men sheberlik synyptary ótkizildi.
Qazaqstan Respýblıkasynyń Elshisi Tólejan Barlybaev jańa kitapty kópshilikke tanystyra otyryp, qazaq aýyzsha folklorynyń kórkemdik qundylyǵyn, onyń janrlyq alýan túrliligi men tildik baılyǵyna toqtaldy.
Ejelgi ertegilerimizdegi ǵasyrlar boıy qalyptasqan halyq danalyǵy men al ony bilý jas ýkraınalyq oqyrmandarǵa qazaqtyń salt-dástúrleri men ádet-ǵuryptaryn tereńirek bilýge múmkindik beretini tilge tıek boldy.
Osy oraıda Taras Shevchenkonyń shyǵarmashylyq murasyna baǵyshtalǵan mádenı baılanystardy nyǵaıtýdyń mańyzdylyǵyn atap ótip, dıplomat onyń týǵanyna 212 jyl tolýyna oraı Uly Kobzar shyǵarmashylyǵynyń qazaq kezeńi jóninde sýrettelgen monografııa basylymǵa daıyndalyp jatqanyn habarlady.
Ýkraınanyń halyq depýtaty Sergeı Nagornıak qazaqstandyqtardy Respýblıka kúnimen quttyqtady jáne Qazaqstannyń ulttyq merekesine oraı izgi tilekterin bildirdi. Parlament múshesi eki el halyqtarynyń dástúrli dostyq qarym-qatynastary men ekijaqty yntymaqtastyqty damytý bolashaǵyna joǵary baǵa berdi. Ol Ýkraınadan balalar toby úshin qazaqstandyq «Baldáýren» oqý-saýyqtyrý ortalyǵyna jazǵy qaıyrymdylyq týryn uıymdastyrýǵa kómekteskeni úshin Qazaqstan tarapyna alǵysyn bildirdi.
Jambyl Jabaev atyndaǵy kitaphanasynyń, «Analar úıi», qoǵamdyq balalar uıymdary men qazaq dıasporasynyń ókilderi ertegiler kitabyn Ýkraınadaǵy kitaphanalaryna tapsyrǵany úshin shynaıy alǵystaryn bildirdi.
Kórkem sýretteri bar, ulttyq boıaýmen toltyrylǵan qazaqtyń dástúrli ertegileriniń kólemdi jınaǵy (256 bet) ýkraın balalarynyń úlken qyzyǵýshylyǵyn týdyratyny basa aıtyldy. Mádenı aksııanyń barlyq jas qatysýshylary ertegiler kitabyn syılyqqa aldy.
«Uly Dalanyń sıqyrly ańyzdary» jınaǵyna 38 ertegi – «Alpamys», «Aldar-kóse», «Abat batyr», «Kúnikeı sulý», «Er Tóstik», «Áýez hannyń qyryq uly», «Jigit pen qasqyr» jáne taǵy basqalary kirdi. 2,5 myń danalyq taralymmen kitap Ýkraına kitaphanalary men mektepterge, balalar úıleri men basqa da áleýmettik mekemelerge taratylmaq.
