Foto: gov.kz
Komıtet ókilderi Alataý qalasy ákimdigi jáne baılanys operatorlarymen birlesip «Zarechnyı» jáne «Jetigen» shaǵyn aýdandarynda, sondaı-aq «Almaty–Qonaev» avtojolynda boldy. Negizgi nazar turaqty sıgnaldy qamtamasyz etý men qala mańy jáne shalǵaı aımaqtardaǵy baılanys sapasyn arttyrýǵa baǵyttaldy.
Sapar aıasynda «Mobaıl Telekom-Servıs» kompanııasynyń besinshi býyn (5G) jelisiniń alǵashqy bazalyq stansııasy iske qosyldy. Bul ınfraqurylym jeliniń ótkizý qabiletin aıtarlyqtaı arttyryp, turǵyndarǵa joǵary jyldamdyqty ınternetke qol jetkizýge múmkindik beredi.
Sapar qorytyndysy boıynsha Alataý qalasy ákimdiginde telekommýnıkasııa ınfraqurylymyn damytý máseleleri talqylanǵan keńes ótti. Kezdesýde 5G jelilerin keńeıtý, memlekettik mekemeler men turǵyn úı massıvterin joǵary sapaly baılanyspen qamtamasyz etý jáne óńirdegi sıfrlyq ınfraqurylymdy jetildirý josparlary qaraldy.
Bilim berý salasyna erekshe nazar aýdaryldy — jyl sońyna deıin Alataý qalasyndaǵy barlyq mektepter joǵary jyldamdyqty ınternetke qosylmaq.
Jıyn qorytyndysynda 2025–2027 jyldarǵa arnalǵan Alataý qalasyn sapaly mobıldi baılanys jáne ınternetpen qamtamasyz etý jónindegi jol kartasyna qol qoıyldy. Qujat aıasynda baılanys jelilerin kezeń-kezeńimen jańartý, jańa ınfraqurylym salý jáne áleýmettik nysandardy ınternetke qosý jumystary kózdelgen.
