Buǵan qosa Aıbar Aıdaruly Eńbek mınıstrligi úzdik bes jas mamannyń tizimine eńgizipti. Bul aıtýly baıqaýda jeńimpaz bolǵandar týraly: «Jeńimpazdar túrli mamandyqtar men salalarda eńbek ótiliniń azdyǵyna qaramastan joǵary kásibı jetistikterge qol jetkizdi. Olardyń qatarynda avıasııa men energetıkadan bastap ken óndirisi, agrarlyq sektor syndy túrli sala ókilderi bar. Bul – olardyń qajyrly eńbegi men kásibı sheberligi tek óz tirshiligin ǵana emes, búkil ujymnyń jumysyn jandandyra alatynyn dáleldeıtin jarqyn mysal», deıdi uıymdastyrýshylar.
«Úzdik jas óndiris qyzmetkeri» ataǵyna ıe bolǵan Aıbar Aıdaruly áriptesterine qaraǵanda, uzaq eńbek etip úlgermese de, qazirdiń ózinde birneshe kúrdeli jerasty mamandyqtaryn meńgerip úlgergen kórinedi. Osy rette bıylǵy «Jumysshy mamandyqtar jyly aıasynda Aıbarmen az-kem áńgime órbitken edik.
– Maǵan baıqaýǵa qatysýdy usynǵanda, táýekel dedim de kúshimdi synap kórýge bel býdym. Qatysýǵa qajetti beınerolıkterdi túsirip, ótinim berdik. Árıne, jeńiske jetkenime qýanyshtymyn, biraq bul ázirge tek aımaqtyq kezeń ǵana. Alda budan da bıik belesterdi baǵyndyrýǵa bar kúshimdi salamyn, – dedi ol.
Aıbar Aıdaruly eńbek jolyn qatardaǵy jumysshydan bastap, qysqa merzim ishinde taýken masteri dárejesine deıin kóterilgen. Qazir ol birneshe jerasty mamandyǵyn ıgerip, jas mamandarǵa úıretip te júr.
– «Shyǵystústimet» JShS – tek óndiris orny emes, bul – úlken mektep. Munda tájirıbeli mamandar mol, eń bastysy, eńbekti baǵalaı biletin júıe qalyptasqan. Kompanııa bizge únemi oqýǵa, damýǵa múmkindik beredi. Sol úshin de men ózimdi osy ujymnyń bir bólshegi retinde maqtan etemin, – deıdi ol.
Onyń aıtýynsha, shahtadaǵy jumys tártibi qatań bolǵanymen, qaýipsizdik erejesi múltiksiz saqtalǵan jaǵdaıda bul mamandyq ózine erekshe qýat pen senim beredi.
– Men úshin eń bastysy – osy eńbektiń elenýi ǵana emes, jer astyndaǵy áriptesterimniń de eńbeginiń baǵalanýy, – deıdi Aıbar Aıdaruly sózin jalǵastyryp. – Biz bir komanda bolyp jumys isteımiz. Ár aýysym saıyn taý ishinde ondaǵan adam birigip, bir maqsat úshin ter tógedi. Ken óndirý ońaı sharýa emes, biraq dál osy ortada men óz isimniń mańyzyn sezinemin.
Jas mamannyń aıtýynsha, kompanııa óńirlerge naqty «donor» rólin atqaryp otyr – salyq túsimderi men áleýmettik jobalar arqyly jergilikti ekonomıkany qoldap keledi.
– Bizdiń bul ken oryndary men úshin tek jumys berýshi emes, tutas óńirdiń tiregi deýge bolady. Osy kásiporynnyń arqasynda shyǵys óńiri talaı shaǵyn kent pen aýyl tirshilik etip otyr. Mysaly, Jezkent, Orlov, Nıkolaev sııaqty eldi mekenderdiń turmys yrǵaǵy osy zaýyttyń jumysyna tikeleı baılanysty. Munda myńdaǵan adam eńbek etedi – kenshi, mehanık, elektrık, ınjener, júrgizýshi, aspaz... Árqaısysy óndiris tizbeginiń mańyzdy bóligi, – deıdi taý-ken sheberi.
– Kópshilik baıqaǵan shyǵar, sońǵy jyldary ınfraqurylym jaqsaryp, áleýmettik nysandar jóndelip jatyr. Munyń bári – óndiris tabysynyń nátıjesi. Biz óndiretin ken – el ekonomıkasynyń ózegi, al onyń artynda adamdardyń qajyrly eńbegi tur. Sondyqtan men ózimdi osy úlken istiń kishkentaı bir bólshegi retinde sezinemin, – deıdi Aıbar Aıdaruly.
Ol aldaǵy ýaqytta óndiristiń jańa tehnologııalaryn meńgerip, ınjenerlik deńgeıge jetýdi maqsat etip otyr. – Eńbek – adamdy shyńdaıdy. Al eger sol eńbegiń elense, odan artyq qýanysh joq, – deıdi jas maman sózin túıindep.
Abaı oblysy
